DILI, 16 jullu 2024 (TATOLI)–Prezidente Autoridade Munisipiu Lautém, Melio de Jesus, hateten Programa Nasionál ba Dezenvolvimentu Suku (PNDS) Lautém implementa projetu konstrusaun no reabilitasaun hamutuk 34 iha tinan ne’e.
PNDS munisipal asina akordu ho PNDS nasionál iha fulan tolu liuba hodi fó kompetensia ba Autoridade munisipál hodi dezenvolve suku liuhusi projetu agrikultura, irrigasaun, reabilitasaun eskola, moru haleu edifisiu públiku sira no bee-moos.
“Projetu sira-ne’e liuhusi PNDS ho totál orsamentu hamutuk rihun $200,” nia hateten ba Agência Tatoli hafoin hala’o enkontru Ministru Administrasaun Estatál, Tomás do Rosário Cabral ho Autoridade munisipál sira ho tema “Progresu Dezenvolvimentu Kapitál”, iha Bebora.
Projetu sira-ne’e ba kada tinan, tanba ne’e mak projetu hotu-hotu sei termina iha 31 dezembru.
Autoridade munisipál sira sei tau programa hamutuk 36-resin ne’ebé sei tau iha Planu Asaun Anuál (PAA) 2025 hodi bele implementa iha tinan oin (2025).
Programa sira-ne’e foku ba dezenvolvimentu aldeia no suku liuliu iha setór agrikultura, irrigasaun, reabilitasaun eskola, moru haleu edifisiu sira no bee-moos ba populasaun.
“Iha tinan oin, ita deside projetu PNDS 36 ba PAA 2025,” nia hateten.
Projetu PNDS ba tinan oin ne’e, autoridade munisípiu Lautém sei aloka orsamentu hamutuk $18 millaun maibé sei diskute iha Komisaun Revizaun Orsamentu ba tinan 2025.
Jornalista : Jesuína Xavier
Editór : Cancio Ximenes
