DILI, 16 Jullu 2024 (TATOLI) – Rai ektare rihun 17 iha Manufahi abandonadu, tanba ne’e Ministériu Agrikultura, Pekuária, Peska no Floresta (MAPPF) sei halo estudu ida hodi define atu kuda hare ka ba atividade seluk.
Prezidente Autoridade Munisípiu Manufahi, Luís Marçal da Costa Tavares, hateten daudaun ne’e iha natar ektare rihun sia mak agrikultór sira utiliza hodi kuda hare, tanba rai sira ne’e potensiál no hetan distribuisaun bee di’ak husi mota sira. Enkauntu rai ektare rihun 17 mak seidauk bele utiliza, tanba laiha bee no rai sira ne’e mós durante ne’e la utiliza hodi kuda hare.
“Ha’u hato’o ona asuntu rai abanonadu ne’e ba Ministériu Agrikultura, maibé parte ministériu sei halo uluk sira-nia estudu ba rai sira molok atu uza hodi kuda hare”, Luís Tavares dehan iha Comoro, ohin.
Ba natar ektare rihun sia ne’ebé daudaun ne’e kuda ona hare ne’e hetan ona apoiu ekipamentu hands tractor 15, maibé ekipamentu sira ne’e seidauk sufisiente atu kobre hotu natar sira ne’e.
Iha Manufahi, iha irrigasaun boot ida iha parte mota Karau Ulun nian mak agora seidauk halo manutensaun no irrigasaun ne’e kuaze tinan 10 ona. Tanba ne’e, komunidade husu ba Ministériu Agrikultura, Pekuária, Peska no Floresta (MAPPF) atu tau atensaun ba mota ne’e hodi bele distribui bee hodi tulun sira halai natar.
“Ami koko atu hamoris fali área sira ne’ebé produtiva atu hasa’e produsaun hare. Tanba ne’e, iha ona irrigasaun balun maka komunidade sira utiliza ona, maibé hela de’it irrigasaun boot ida iha Karau Ulun maka seidauk hadi’a tanba hetan estragu maka’as”, dehan.
Prezidente autoridade ne’e salienta katak MAPPF tau ona orsamentu ba infraestrutura atu konstroi irrigasaun sira iha territóriu, inklui irrigasaun boot Karau Ulun nian ne’ebé danifika.
Iha sorin seluk, Diretór-Jerál Agrikultura Kafé no Planta Industriál, Martinho Lurentino Soares, dehan rai sira abandona iha Manufahi ka iha fatin sira seluk iha territóriu ne’ebé kategoria seidauk utiliza hodi kuda hare ne’e tenke halo lai estudu no kuandu konsidera rai ne’e produtivu duni atu utiliza hodi kuda hare maka foin bele deside, nomós presiza haree ba kestaun bee.
“Ita konsidera rai barak maka sei abandona hela. Ne’e duni, ita sei halo uluk estudu ba rai sira ne’e depois maka ita sei define ho didi’ak atu bele utiliza”, salienta.
Notísia relevante: MAPPF rejista natar ektare 44.500 mak funsiona iha territóriu
Jornalista: Tomé Amado
Editora: Maria Auxiliadora
