DILI, 16 Maiu 2024 (TATOLI) – Ministériu Agrikultura, Pekuária, Peska no Floresta (MAPPF) rejista natar ektare rihun 44.500 maka daudaun ne’e funsiona iha territóriu hodi halo produsaun hare.
Husi númeru ne’e, iha 2023, ministériu reativa natar ektare rihun 37.500 no, iha 2024, funsiona tan ektare rihun hitu.
Tuir dadus Ministériu Agrikultura, Timor-Leste iha natar potensiá hamutuk ektare rihun 85, maibé foin iha 44.500 mak funsiona, enkuantu rihun 40.500 maka sei abandona hela.
Diretór Nasionál Ortikultura, Lúcio Ramiro Ribeiro, haktuir katak ninia parte daudaun ne’e halo ona esforsu hodi foti ona dadus sira kona-ba produsaun hare iha rai-laran. “Ha’u hakarak dehan iha mandatu nonu Governu nian ne’e foin maka la’o tinan ida, molok to’o tinan lima ne’e ita bele atinje ona natar ektare rihun 50 no sei hetan produsaun foos kuaze 70%”, dirijente ne’e dehan iha Comoro, ohin.
Tuir nia, bainhira atu atinje alvu ne’ebé determina ona, Ministériu Agrikultura halo ona esforsu tomak liuhusi espansaun hodi halo estensifikasaun ba terrenu abandonadu hamutuk ektare 40.500. Ministériu tinan ida ne’e sei sosa tan hand tractor unidade 400 no tratór 25 no tinan oin sosa hands tractor rihun 2.000 no tratór 25.
Tanba ne’e, nia garante katak maske to’o tinan lima la redús 100% importasaun foos, maibé bele redús pur volta 25% to’o 30%.
“Ministériu Agrikultura kontinua serbisu hamutuk ho parseiru no setór privadu sira ne’ebé iha interese hakarak investe iha setór agrikultura no sira rasik promete ona bainhira hare sira ne’ebé agrikultór sira prodús ona iha kada munisípiu sira sei sosa”, adianta.
Nia salienta katak meiu seluk ne’ebé atu apoia produsaun hare iha tinan lima ne’e maka irrigasaun no daudaun ne’e iha ona irrigasaun tolu ne’ebé modernu no iha irrigasaun ki’ik hamutuk 36 maka fornese ona bee ba natar sira.
Diretór Servisu Agrikultura Munisípiu Manufahi, Eltino dos Santos Araújo, haktuir katak natar iha Manufahi ne’ebé reativa ona hamutuk ektare 340 ne’ebé mai husi postu tolu mak hanesan, Faturberlihu iha ektare 100, Alas iha ektare 206 no Betano iha ektare 34. Natar sira ne’e foin maka reativa iha époka dahuluk.
Bee ne’ebé distribui ba natar sira ne’e fornese husi bee-inan iha área Lafahek Hasan no natar sira ne’e foin mak atinje 25%.
Jornalista: Tomé Amado
Editora: Maria Auxiliadora
