DILI, 16 jullu 2024 (TATOLI)–Sekretáriu Jerál g7+, Helder da Costa, hamutuk ho nia ekipa, tersa ne’e, relata progresu serbisu ba Primeiru-Ministru (PM), Kay Rala Xanana Gusmão.
“Ami ohin mai atualiza progresu serbisu no atualiza mós kona-ba planu serbisu ne’ebé ita sei halo iha fulan-neen oin mai iha tinan ne’e,” Helder da Costa, hateten hafoin hasoru malu ho PM Xanana, iha Palásiu Governu Dili.
Progresu serbisu ne’ebé relata mak hanesan foin lalais ekipa ba Xina tanba hetan konvite husi China International Development Coorperation Agency (CIDCA), ne’ebé hetan partisipasaun husi país 130 nomós hetan partisipasaun husi organizasaun internasionál 30-resin.
“Iha eventu ne’e ko’alia kona-ba oinsá ita bele promove Xina nia apoiu dezenvolvimentu iha país g7+, sira kontente tebes tanba rona katak ita-nia Prezidente Repúblika, José Ramos Horta iha tempu badak sei halo vizita ofisiál bá Xina, ne’ebé sei ko’alia kona-ba kooperasaun ekonomia ninian,” nia akresenta.
Notísia relevante : Observadór g7+ rekomenda pontu prinsipál neen ba órgaun eleitorál Illa Salomon
g7+ iha fulan-neen oin mai sei organiza eventu altu nível (summit of the future 2024) iha Asembleia Jerál Organzasaun Nasaun Unida (ONU), Nova Iorke, ne’ebé sei realiza iha loron 20 to’o 21 setembru oin mai, ne’ebé sei partisipa direita husi PM Xanana no iha ne’ebá PM mós sei partisipa atividade kona-ba ekonomia.
“Eventu ne’ebé ita sei realiza ho nia tema kona-ba pás iha g7+ nia membru Estadu sira no buka atu promove pás iha nível mundiál, tanba Timor-Leste nu’udar país kiik maibé hadomi pás liuhusi ita-nia líder sira,” Helder da Costa, tenik.
Durante vizita PM sei inaugura inskritóriu g7+ iha Nova Iorke, nune’e ekipa sei halo preparasaun másimu.
“Ho eventu sira ne’ebé sei akontese ohin, PM fó orietasaun katak ami tenke halo preparasaun ne’ebé di’ak tanba Xefe Estadu no ministériu balun no g7+ sei ko’alia kona-ba progresu serbisu no dezafiu g7+ ne’ebé ita enfrenta. PM husu ami mantein responsabilidade ba knaar ne’ebé fó mai hodi fahe informasaun no promove Timor-Leste ninian knaar nu’udar anfitriál ba g7+ kontinua habelar informasaun iha nível internasionál,” nia dehan.
Serbisu hotu ne’ebé g7+ halo iha vizita Papa nian maka sei mai iha tinan ne’e, PM sei disamina nafatin Timor-Leste ninia knaar iha nível internasionál liuhusi promove pás no rekonsiliasaun ba rai seluk.
“PM mós temi katak Sekretáriu Jerál ONU António Guterres sei mai partisipa komemorasaun loron Konsulta Populár iha loron 30 agostu 2024. Ami sei serbisu ho Sekretáriu Jerál nune’e bele partisipa mós eventu altu nível g7+ ne’ebé sei realiza setembru iha Nova Iorke,” nia salienta.
Jornalista : Arminda Fonseca
Editora : Julia Chatarina
