CNC, I.P no FDCH asina akordu apoia subsídiu ba bolseiru 15
DILI, 17 jullu 2024 (TATOLI)—Centro Nacionál Chega, Institutu Públiku (CNC, I.P) no Fundu Dezenvolvimentu Kapitál Umanu (FDCH, sigla portugés), asina akordu ho bolseiru na’in-15 ne’ebé hanesan sobrevivente vulnerável nia oan, hodi hetan subsídiu husi Governu.
“Ita serbisu hamutuk ho parseiru sira hodi rekolla dadus vítima sobrevivente sira. Ita haree ida-ne’ebé vulnerável liu ita koopera ho FDCH atu apoiu subsídiu hodi haree sira-nia oan bele asesu ba edukasaun iha universidade sira Timor-Leste to’o ramata, ho ida-ne’e ohin iha bolseiru 15 mak asina akordu hodi hetan subvensaun,” Diretór Ezekutivu CNC, I.P, Hugo Maria Fernandes, hateten, iha ámbitu selebrasaun CNC, I.P ba dahitu, iha salaun Delta Nova, kuarta ne’e.
Bolseiru na’in-15 ne’ebé sei kontinua estudu iha ensinu superiór sira iha Dili mak hanesan Cecília Barreto, Dino Ribeiro, Dírcia Fátima, Ermelinda da Costa, Flora Soares no seluk tan.
Tuir akordu, kada bolseiru iha kada fulan sei hetan transferénsia $150 ba konta bankária.
Iha tinan 2023, CNC, I.P koopera ho FDCH hodi atribui bolsa estudu ba estudante hamutuk 11.
Notísia relevante : FDCH fó bolsa parsiál ba estudante 3.030 husi IES 17
Iha fatin hanesan, Diretór FDCH, Júlio Aparício, husu ba bolseiru sira ne’ebé ohin hetan ona bolsa estudu atu aproveita ho di’ak hodi hatudu ba inan-aman katak liuhusi sira-nia sakrifísiu bele susesu iha futuru hodi kontinua luta ba dezenvolvimentu rai ne’e nian.
“Ha’u hatene katak imi mak sei sai kontinuadór luta ba dezenvolvimentu nasaun nian, nune’e tenke aproveita ho di’ak oportunidade ne’ebé imi hetan, maibé imi la aproveita ho di’ak mak sei lakon bolsa estudu ida-ne’e,” nia hameno.
Benefisiáriu bolsa estudu, Cecília Barreto husi munisípiu Bobonaro, daudaun hala’o nia estudu iha Universidade Nasionál Timor-Lorosa’e (UNTL) Departamentu Ekonomia, apresia tanba Governu bele rekoñese sira-nia inan aman nia kontribuisaun luta.
“Ha’u sente kontente tebes tanba Governu bele rekoñese ha’u-nia inan aman nia luta bele fó bolsa estudu ba ami oan sira, ha’u promete sei aproveita oportunidade ida-ne’e ho di’ak hodi halo ha’u-nia tuir kontratu ne’ebé iha, tanba tuir akordu ne’e ami hetan bolsa estudu ne’e to’o ramata ami-nia estudu,” nia dehan.
Nune’e, Bolseiru Dino Reibeiro, hateten, nu’udar oan ba sobrevinte vulnerál, nia agradese ba Governu tanba bele fó oportunidade ba sira.
“Ohin ha’u asina ona akordu, ba oin ha’u sei la’o tuir akordu ne’ebé iha katak tenke eskola to’o hotu no labele kria problema durante ha’u hetan bolsa estudu,” nia tenik.
Jornalista : Arminda Fonseca
Editora : Julia Chatarina
