DNTT rekolla reseita millaun $2-resin iha janeiru-juñu 2024
DILI, 17 jullu 2024 (TATOLI)—Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT) rekolla ona reseita hamutuk $2.652.846,25 ba kofre Estadu, hahú husi janeiru to’o juñu 2024.
“Reseita ne’e sa’e 19,67% kompara ho reseita janeiru-juñu 2023, ne’ebé DNTT rekolla $2.216.689,” refere nota ne’ebé Agência Tatoli asesu, kuarta ne’e.
Reseita ne’ebé rekolla mak hanesan janeiru $405.333, fevereiru $435.878, marsu $475.338, abríl $462.331,50, maiu $441.030,25 no juñu $432.935,50.
Notísia relevante : DNTT rekolla reseita millaun $3 iha tinan 2022
DNTT nu’udár administrasaun públika Estadu nian ne’ebé tutela ba MTK, ho nia knaaar sira mak hanesan dezenvolve enkuadramentu legál no regulatóriu ba atividade sira iha setór transporte terrestre, inklui padraun tékniku seguransa nian ne’ebé tenke observa iha transporte pasajeiru no sasán sira.
Kona-ba manutensaun no jestaun sistema rejistu nasionál ba veíkulu hotu-hotu inklui alokasaun ba xapa númeru, avalia no aprova aplikasaun atu loke eskola kondusaun privada, nune’e mós fó lisensa no fiskaliza atividade sira iha setór transporte terrestre tuir provizaun legál sira.
Aleinde ne’e, diresaun ne’e kolabora ho Polísia iha monitorizasaun, implementasaun no kumprimentu ba regulamentu tránzitu nian inklui inspesaun ba veíkulu sira.
Jornalista : Arminda Fonseca
Editora : Julia Chatarina
