DILI, 17 jullu 2024 (TATOLI) – Konsellu Ministru (KM), kuarta ne’e, delibera hodi aprova montante totál despeza nian ne’ebé relasiona ho títulu orsamentál ida-idak kona-ba Orsamentu Jerál Estadu ba tinan 2025, ho valór globál ne’ebé prevee dolar amerikanu billaun $1,8.
“Montante ne’e inklui orsamentu Administrasaun Sentrál, Seguransa Sosiál no Rejiaun Administrativa Espesiál Oé-cusse Ambeno (RAEOA),” tenik iha nota ne’ebé Agência TATOLI asesu.
Distribuisaun tetu agregadu Orsamentu ba Administrasaun Sentrál iha OJE tinan 2025, tuir setór ne’ebé define ona husi programa Governu no Planu Estratéjiku Dezenvolvimentu Nasionál (PEDN) ho Setór Kapitál Sosiál simu alokasaun ho montante 38%, tuir kedas Setór Enkuadramentu Institusionál ho 36%, Dezenvolvimentu Infraestrutura 16% no Dezenvolvimentu Ekonómiku 10%.
Tetu dezagregadu sira sei distribui ba entidade públika sira iha loron 23 Jullu 2024, no sira iha loron 11 hodi elabora sira-nia proposta orsamentál.
Proposta sira ne’e sei analiza husi Komité Revizaun Orsamentál husi loron 12 to’o 17 Agostu 2024.
Prevee katak Proposta Lei OJE tinan 2025 sei entrega ba Parlamentu Nasionál to’o loron 1 outubru 2024.
Notísia relevante:Ezekusaun OJE 2024 foin atinje 32%
Jornalista: Hortencio Sanchez
Editór: Florencio Miranda Ximenes
