ME planeia tinan oin tau investimentu boot ba ekipamentu prátika ESTV
DILI, 17 jullu 2024 (TATOLI)–Ministériu Edukasaun (ME) no Sekretaria Estadu Ensinu Sekundáriu Jerál no Ensinu Tékniku Vokasionál iha ona planu atu halo investimentu boot ba ekipamentu prátika iha Eskola Ensinu Sekundáriu Tékniku Vokasionál (ESTV).
“Tékniku Vokasionál Natarbora munisípiu Manatuto iha estudante 200-resin, ESTV Dotik Same iha estudante 96, ESTV Betano iha estudante 80-resin. Tanba ne’e, planu Ministériu Edukasaun iha IX Governu Konstituisionál mak halo investimentu boot liu Ensinu Sekundáriu Tékniku Vokasionál, nune’e tinan oin ita sei investe maka’as liu iha ekipamentu prátika sira,” Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, informa ba Agência Tatoli, iha Vila Verde, kuarta ne’e.
Inisiativa ne’e hodi bele aumenta númeru partisipasaun ka matrikulasaun estudante foun iha tékniku vokasionál.
“ME nia polítika iha tinan 2024 mak atu redús númeru matrikulasaun estudante sekundáriu jerál no hasa’e partisipasaun iha ESTV. Maibé bainhira ita la atinje meta ida-ne’e, entaun ami nafatin esforsu hodi halo planu estratéjiku ida nune’e avansa ba implementasaun,” nia akresenta.
Ministériu iha ona planu atu halo ESTV iha Dili sai estabelesimentu integradu, nune’e fulan-setembru ka outubru sei lansa iha ESTV Becora.
Diretór Diresaun Nasionál Ensinu Sekundáriu Jerál iha ME, Benjamin Fernandes, hateten, ensinu sekundáriu tékniku vokasionál iha tinan 2022 ne’e rekonverte ba eskola ensinu sekundáriu jerál tanba estudante timoroan maioria la interrese asesu ba eskola ensinu tékniku vokasionál.
“Ita hatene katak mundu ne’e avansa ho eskola tékniku vokasionál maibé ita Timor- Leste pelu kontráriu tanba estudante laiha vontade hodi asesu ba tékniku vokasionál,” nia tenik.
Notísia relevante : Posibilidade ME koloka kandidatu admitidu faze daruak ba ESTV hodi prepara ezame nasionál
Diretór dehan, iha rai-li’ur hanesan iha Filipina ne’e ema ko’alia barak liu mak eskola tékniku vokasionál.
“Entaun, tuir observasaun katak rekursu ba tékniku mak seidauk di’ak. Ida-ne’e ita mós rekoñese materiál ne’e ita tau orsamentu ne’e fasil no ita bele sosa maibé rekursu umanu ne’e buat ne’ebé defísil,” nia salienta.
Tanba ne’e, iha tinan 2016, eskola sekundáriu hamutuk 11 mak halo konverte ba iha ensinu tékniku vokasionál. hafoin, iha tinan 2022 ne’e, eskola ualu mak rekonverte fali ba sekundáriu jerál mak eskola ida iha Fohorem, Zumalai nian, Fatuhudo Ainaro, Manufahi nian ne’e eskola Borja da Costa iha Betano, Manatuto mak eskola ida Soibada no ida tan mak eskola númeru 3 Bobonaro no Eskola Rai-kalan Ainaro.
Agora ne’e konverte mak tékniku vokasionál mai fali sekundáriu jerál mak eskola ida iha Metinaro, ida seluk mak iha Cailaco no Lauana Letefoho Ermera.
“Problema hanesan ne’e bainihira eskola tékniku vokasionál ida konverte ba eskola sekundáriu jerál ne’e tanba estudante barak mak ladún gosta, entaun estudante hahú menus. To’o ikus tenke rekonverte fali tanba hakarak lakohi tenke, ita-nia Estadu harii uma barak no estudante menus inklui fasilidade la to’o, entaun dalan mak tenke rekonverte. Ida-ne’e akontese iha tinan 2023 nian,” nia dehan.
Hafoin rekonverte, realidade ne’ebé iha mak estudante barak mak asesu ba eskola sekundáriu jerál.
Iha despaixu ministeriál ne’ebé kuandu rekursu umanu no fasilidade eskolár menus, entaun eskola referidu bele konverte no rekonverte fali.
Ho kestaun hirak-ne’e maka Sekretáriu Estadu dehan ho polítika IX Governu liuhusi ME ho nia Sekretáriu Estadu no Diresaun hotu esforsu hodi implementa tanba iha ESTV estudante ladún barak mak asesu, só ESTV 28 Novembru Becora mak manorin hanorin di’ak, nune’e ESTV ida-ne’e estudante hamutuk 500-resin, ESTV seluk la to’o.
Jornalista : Osória Marques
Editora : Julia Chatarina
