DILI, 16 jullu 2024 (TATOLI)—Ministériu Edukasaun (ME) iha posibilidade koloka kandidatu admitidu husi programa rekrutamentu bolsa kandidatu ba Eskola Ensinu Sekundáriu Tékniku Vokasionál (ESTV) hodi prepara ba ezame nasionál.
“Maski bolsa kandidatu ne’e ba primeiru no segundu siklu nian, maibé profesór sira ne’ebé kompete ne’e maihusi esperiénsia barak liu ne’e husi área tékniku vokasionál. Nune’e ita hein semana ne’e ezame bolsa kandidatu hotu mak diresaun ensinu sekundáriu tékniku sei halo proposta nune’e bele koloka profesór ba ensinu téniku vokasionál hodi prepara ba ezame nasionál,” Sekundáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lemos Lopes, informa iha Eskola ESTV 28 Novembru Becora, tersa ne’e.
Ekipa husi ME iha loron 25 juñu halo abertura levantamentu dadus iha eskola sekundáriu ho ensinu tékniku vokasionál hodi konfirma kuantidade profesór, nune’e bele fó sai rezultadu bainhira rekolla hotu dadus iha nível territóriu.
“Kada departamentu ka matéria sira ne’ebé mak profesór la to’o bele alista hotu mak submete ba ME hodi halo análiza depois haree ba nia posibilidade la’o hanesan, maibé polítika ME mak loke rekrutamentu bolsa kandidatu profesór ba primeiru no segundu siklu,” nia tenik.
Notísia relevante :
Diretór Eskola ESTV 28 Novembro Becora, Tomás Pinto, dehan, eskola ne’e menus profesór maibé ho planu ne’ebé mak Governu iha maka iha tinan 2025 sei prense hotu iha área hirak-ne’e.
“Ami presiza profesór reprodutivu ba Departamentu Eletrisidade nian tanba daudaun ne’e ita iha de’it profesór na’in-ida. Entaun ami presiza tan na’in-haat ka lima, Departamentu Artegráfika mós ema ida de’it no presiza tan ema na’in-haat ka lima, Departamentu Eletrónika no Informátika presiza na’in-haat tanba daudaun ne’e na’in-rua, no Departamentu iha na’in-rua ona no aumenta tan na’in-haat,” nia dehan.
ME mós identifika ona profesór iha área reprodutivu nian na’in-rua iha Hera, ne’ebé semana oin sei transfere mai Dili.
Jornalista : Osória Marques
Editora : Julia Chatarina
