DILI, 17 jullu 20204 (TATOLI)–Ministériu Ensinu Supérior Siénsia no Kultura (MESSK) seidauk autoriza instituisaun foun tolu hanesan Fundasaun Intelijénsia Santu António, Akadémika Polísia no Institute Provides English Lessons atu hala’o prosesu ensinu aprendizajen tanba sira seidauk prense kritéria.
“Durante ne’e ita simu dokumentu kona-ba kriasaun instituisaun ensinu superiór tolu ne’ebé mai rejistu hodi hetan lisensa atu sira bele halo sira-nia atividade aprendizajen, maibé husi dokumentu ne’ebé sira hatama ne’e la integra ba regra ne’ebé mak iha ba kriasaun instituisaun ensinu superiór. Entaun, ita la atribui lisensa operasaun ba instituisaun ensinu supérior foun tolu ne’e tanba seidauk prense kritériu ne’ebé mak iha,” Ministru Ensinu Superiór Siénsia no Kultura, José Honório da Costa Pereira Jerónimo, informa ba Agência Tatoli, iha edifísiu Colmera, tersa ne’e.
Nune’e, ministériu haruka filafali sira-nia dokumentu atu sira bele haree didi’ak no halo estudu viabilidade hodi prense regra hafoin submete fali hodi halo avaliasaun.
“Bainhira ita avalia mak prense ona regra hirak ne’e maka sei fó lisensa ba sira atubele halo atividade, maibé se nafatin la prense ita la fó lisensa, ita tenke haree didi’ak buat sira ne’e tanba la’ós sira haruka mai ministériu haree no fó kedas lisensa ne’e lae, tenke haree lai,” nia akresenta.
Notísia relevante : MESSK asina akordu ho ICCCM hodi forma rekursu umanu
Kritéria ne’ebé mak atu prense bainhira loke institutu ensinu superiór ne’e mak tenke iha fatin rasik, estatutu, iha rekursu umanu, no orsamentu.
Xefe Departamentu ba kursu foun, Luís Aparício Guterres, hateten, instuisaun tolu ne’e presiza halo estudu viabilidade molok loke universidade.
“Ne’ebé ita fó fila sira-nia dokumentu ona maibé ita fó mós prazu ba sira fulan-ida atu hatama fali, se la biban tinan oin sira bele submete fali,” Diretór hato’o.
Antes ne’e, Komandante Pesoál no Formasaun, Superintendente Xefe Arquimino Ramos, husu MESSK atu re-akredita fali instituisaun Akadémiku Polísia.
“Estatutu lei organizasaun PNTL ne’e ita iha ona, akadémika PNTL ne’e eziste kleur ona no akreditadu ona husi MESSK, maibé agora kaduka tiha, ho ida-ne’e ita halo proposta ba ministériu atu re-akredita ba instituisaun akadémika ne’e atubele loke universidade,” Komandante Arquimino Ramos, esplika.
Instituisaun Akadémika haree ona proposta ne’ebé MESSK haruka fila ne’e, katak instituisaun PNTL loke universidade ne’e tenke halo uluk estudu viabilidade molok submete hikas dokumentu.
“MESSK entrega filafali dokumentu mai ita atu halo estudu viabilidade, ne’ebé hahú iha loron 15 ba oin ita halo estudu viabilidade, hafoin rezultadu ne’e sei aprezenta ba Ministériu Ensinu Superiór atu sira bele halo avaliasaun bainhira maka sira bele fó lisensa para ita kontinua,” nia katak.
Bainhira re-akreditasaun ba instituisaun akadémiku maka sei garante ba rekursu ne’ebé sei estimula iha siénsia polisiál.
“Ita iha rekursu umanu ne’ebé sufisiente, ita iha kolega barak hasai kursu mestradu, lisensiadu no doutoramentu iha PNTL, ne’ebé bele garante kursu ida-ne’e bele la’o tanba ita iha estudu siénsia Polísia ne’e to’o ona nível mestradu, ne’ebé ita bele loke ona kursu sira hanesan iha Mozambique, Filipina no Austrália inklui Indonézia maka agora daudaun ita haruka ona na’in-rua bá, na’in-rua seluk sei bá iha Portugal, ne’ebé tempu besik sira sei fila mai para reforsa instituisaun ne’e. Daudaun ne’e rekursu PNTL iha doutoramentu rua, maestradu 43 no lisensiadu 600-resin inklui nível baxaleratu,” nia tenik.
Jornalista : Osória Marques
Editora : Julia Chatarina
