iklan

EDUKASAUN, HEADLINE

MESSK asina akordu ho ICCCM hodi forma rekursu umanu

MESSK asina akordu ho ICCCM hodi forma rekursu umanu

Asina akordu entre MESSK no ICCCM ba formasaun dirijente iha ministeriu, iha salaun enkontru ME, Vila-Verde, tersa (19/06/2024). Imajen Tatoli/Osória Marques

DILI, 18 juñu 2024 (TATOLI)–Ministériu Ensinu Superior Siénsia no Kultura (MESSK) asina akordu ho International Cultural Communication Center Malaysia (ICCCM), tersa ne’e, hodi fó formasaun ba dirijente sira iha ministériu.

”Sira konvida ha’u bá vizita sira-nia International Transnational Education Association (ITEA) no ICCCM hodi halo diskusaun oituan, entaun ohin MESSK liuhusi Diretór Jerál Administrasaun Finansa no Planeamentu asina akordu tékniku ida ho sira atu fó kapasitasaun ba ita-nia rekursu umanu ministériu nian,” Ministru Ensinu Superior Siénsia no Kultura, José Honório Gerónimo informa, hafoin asina akordu, iha salaun enkontru MESSK, Vila-Verde.

Aleinde kapasita dirijente sira iha MESSK, organizasaun rua ne’e mós sei ajuda malu atu haree kurríkulu, liu-liu relasaun ho IX Governu nia programa kona-ba estabelesimentu politékniku.

“Tanba ne’e sei haree ba kurríkulu ne’e no téknikamente sira sei diskute hanesan parte ida ba preparasaun ministériu nian, nune’e ita bele tama ba ASEAN. Ita tama ba ASEAN tenke loke-an ho país ne’ebé iha rejiaun ne’e atu ita bele kapasita ita-nia funsionáriu sira nomós ita-nia joven sira ne’ebé atu ba universidade, ne’e importante tebes. Tanba ne’e mak kooperasaun ida ho ITEA no ICCCM ne’e importante tebes atubele ajuda ministériu fó formasaun ida-ne’ebé di’ak ba ita-nia funsionáriu sira no iha tempu hanesan bele fó tulun mós ba ita-nia universidade liuhusi kurríkulu ne’ebé téknikamente sira sei diskute,” nia relata.

Notísia relevante : Japaun hakarak apoia Timor-Leste forma rekursu umanu ba adezaun ASEAN

Akordu ne’e ba tinan-ida nian maibé sei iha prolongamentu bainhira haree ba nesidade ne’ebé presiza iha futuru.

“Depoisde ida-ne’e, diretór sira sei diskute ho sira no ita mós tau ona osan formasaun ba ita-nia kuadru superiór sira hanesan diretór jerál, diretór nasionál, inklui xefe departamentu sira. Ita bele haruka daudaun sira ba tuir formasaun ida di’ak iha Malázia iha sira-nia organizasaun referidu tanba sira estabelese ona sira-nia organizasaun ne’e iha país 60 iha mundu, ohin ho ita,” Ministru informa.

Bainhira diskusaun entre organizasaun rua ne’e la’o di’ak maka MESSK sei haruka uluk dirijente na’in-lima ba tuir formasaun iha instituisaun referidu no kontinua kedas ho direjente na’in-10, depende ba osan ne’ebé MESSK aloka ba formasaun.

“Ita sei hahú husi na’in-lima depois ba 10, depende ba osan ne’ebé ministériu iha parte Diresaun Rekursu Umanu aloka orsamentu ba formasaun kuadru superiór iha ministériu. Tenke hahú halo ida-ne’e tanba ita hanoin ba tempu naruk importante tebes atu kuadru superiór sira pelumenus sira hatene saida mak sira halo iha sira-nia serbisu fatin,” nia tenik.

Iha Orsamentu Jerál Estadu (OJE) aloka atu fó formasaun ba direjente sira iha ME no aloka osan iha Fundu Dezenvolvimentu Kapitál Umanu (FDCH, sigla portugés) ho montante rihun $100 ba formasaun iha rai-laran.

Prezidente ICCCM, Nicy Bai, iha esperansa liuhusi kooperasaun ne’e bele serbisu hamutuk iha futuru ho di’ak no bele ajuda timoroan sira atu serbisu ho responsabilidade no profesionál.

“Iha kompromisu ba kooperasaun entre nasaun rua ne’e sei kontinua aumenta iha futuru, nune’e ita iha espíritu ne’ebé forte atu serbisu hamutuk ho di’ak. Ho kooperasaun projetu ne’e ami hein katak sei ajuda timoroan sira hodi serbisu ho profisionál no responsável liután,” nia salienta.

Nicy Bai agradese ba Governu Timor-Leste, liu-liu MESSK tanba iha disponibilidade atu diskute ho instituisaun referidu hodi fasilita malu iha futuru.

“Liuhusi kooperasaun ida-ne’e ami garante no ami sei serbisu maka’as no husi projetu ne’e ita fiar duni katak ita sei sai nu’udar fonte enerjia umana. Ami hein katak ida-ne’e mak buat ne’ebé ami sei halo. Ami-nia projetu hein atu ajuda nomós lori ba Timor-Leste atu hetan aprovasaun husi nasaun oin-oin iha mundu tomak,” nia tenik.

Prezidente ITEA, Mohammad Nuh, liuhusi vídeo mós agradese ba Governu liuhusi MESSK, ne’ebé simu pedidu husi ITEA no ICCCM hodi serbisu hamutuk.

“Agradese tebes ba MESSK nia-laran luak tanba ohin loron ita serbisu hamutuk ona liuhusi asina akordu ne’e. Ida-ne’e ita sei hahú troka ideia ba malu halo diskusaun nune’e ita bele kapasita ita-nia ema sira no joven sira husi nasaun ba nasaun, husi universidade ba universidade. Ida-ne’e nu’udar oportunidade di’ak tebes ba ita hotu tanba liuhusi parseria ida-ne’e mai ita serbisu hamutuk ba futuru ida-ne’ebé naroman liu no iha mudansa  di’ak ho ideia konstrutivu sira,” nia otimista.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!