DILI, 17 Jullu 2024 (TATOLI) – Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) simu ona informasaun katak sei iha manifestasaun pró Papua no Palestina iha vizita Papa Francisco nian, tanba ne’e instituisaun seguransa no defeza ne’e mós preparada ona atu foti medida hasoru grupu sira ne’e.
Komandante Jerál PNTL, Komisáriu Jerál Polísia Henrique da Costa, haktuir katak komandu Polísia no Forsa Defeza iha ona akordu operasaun konjunta nia laran no sei responsabiliza seguransa másima iha vizita Papa Francisco iha Timor-Leste. Tanba ne’e, bainhira iha asaun ruma husi parte ne’ebé de’it maka deskonfia perturba vizita Papa nian ne’e, sei iha medida hasoru ema sira ne’e.
“Ita simu ona informasaun kona-ba grupu joven balun maka sei uza oportunidade iha vizita Papa Francisco nian atu loke sira-nia espanduk kona-ba sira-nia apoiu solidariedade ba Papua no Palestina”, komandante hateten iha Kuartél Jerál PNTL, Caicoli, ohin.
Henrique da Costa husu ba joven sira iha ne’ebé de’it atu uza oportunidade ida ne’e hodi simu vizita Papa nian ho pás no hakmatek no lalika atu hanoin ba buat ne’ebé la importante, tanba apoiu solidariedade ne’ebé, tuir informasaun, atu fó ba Papua ho Palestina ne’e sei estraga momentu di’ak ne’ebé ema hotu hein.
“Ha’u apela ba ita hotu katak ita ne’e viziñu ho Indonézia, ita foin sai husi situasaun 99 nian. Di’ak liu mai ita hamutuk mantein amizade ho Indonézia, nune’e ita labele kria fali instabilidade iha ita-nia rain no labele prejudika fali estabilidade iha fronteira”, nia apela.
Nia solisita ba grupu joven sira hotu atu tetu ho didi’ak molok atu halo asaun ruma, maibé parte seguransa no defeza sei uza ninia kompeténsia tuir lei ne’ebé iha hodi foti medida ruma hasoru grupu sira ne’ebé naka sei halo.
Xefe Estadu-Maiór Jenerál F-FDTL, Tenente-Jenerál Falur Rate Laek, dehan serbisu operasaun konjunta ida ne’ebé sira parte rua halio atu garante estabilidade ba nasaun, maibé se mosu buat ruma ne’ebé la garante ba pás, sei iha medida ruma hasoru asaun sira ne’e.
Tenente-Jenerál mós husu ba sidadaun hotu labele hetan influensia husi ema seluk, maibé buka atu koopera nafatin ho PNTL no F-FDTL hodi la’o hamutuk iha dalan ida de’it atu lori susesu ba preparasaun hotu hodi simu Papa Francisco.
Notísia relevante: PNTL no F-FDTL formaliza operasaun konjunta “Pombu Mutin” ba vizita Papa Francisco
Jornalista: Tomé Amado
Editora: Maria Auxiliadora
