BOBONARO, 17 jullu (TATOLI) – Prezidente Autoridade Munisípiu Bobonaro, Alexandrino Pires, sei tau prioridade ba sub-setór ortikultura no akuakultura iha Orsamentu Jerál Estadu tinan fiskál 2025 tanba sub-setór rua ne’e bele fornese reseita ne’ebé boot iha futuru.
Alexandrino Pires, hateten agora oportunidade di’ak atu tau prioridade ba sub-setór rua ne’e, tanba Ministériu Agrikultura, Pekuária, Peska no Floresta entrega ona kompeténsia mai munisípiu, nune’e ne’e nia orienta diresaun agrikultura atu tau orsamentu iha tinan 2025 atubele rekruta funsionariu sira no halo kolam iha fatin potensiál sira nune’e bele dezenvolve atividade hakiak ikan bee-midar.
Nia hatutan, iha tempu badak hamutuk ho Sekretáru Estadu Peska sei ba halo site visited iha suku ne’ebé poténsia ba bee.
Notísia relevante: Sentru Viveiru Mugis prepara fini ikan rihun 15 atu distribui ba komunidade
“Ida-ne’e orientasaun, ha’u hakarak tau osan, tanba munisípiu Bobonaro iha postu balu ne’ebé dook liu husi tasi, ita presiza halo investimentu ida ba iha ikan bee-midar. Ida-ne’e importante loos ita tenke ser tau osan, tanba parte hosi Lolotoe, Bobonaro tesik iha ne’e sa’e ba koléjiu,” nia hateten asuntu ne’e iha enkontru konsellu koordenasaun munisipál, ne’ebé realiza iha salaun Mari-Tapo, kuarta ne’e.
“Ita-nia osan sira ne’e durante ne’e sai hotu ba rai-li’ur, ikan muzair sira-ne’e importa mai, sé ita halo ida-ne’e trava ona merkadu ne’e, labele lori tama mai, ita bele tau ona ba loja sira iha-ne’e, hasai sirkulár ida obrigatóriu tenke fa’an ita-nia ikan lokál,” nia hateten.
Líder másimu munisípiu Bobonaro ne’e, salienta Bobonaro iha poténsia ba ortikultuta iha fatin barak hanesan iha parte koléjiu no seluk tán.
Prezidente Autoridade Munisípiu Bobonaro ne’e sei halo investimentu ba turizmu liuliu halo pixina iha kanu-matan área suku Lahomea no Ritabou.
“Ita bele halo fatin ne’e di’ak, ida-ne’e tama ona ba turizmu, ha’u ko’alia ona ho Vise Primeiru Ministru, nia dehan ha’u iha osan oituan atu dezenvolve, ita halo ida-ne’e prepara live múzika iha-ne’ebá ema hotu-hotu bele ba hari’is iha-ne’ebá, osan balun bele tama mai,” nia katak.
Enkuantu dadaun ne’e munisípiu Bobonaro iha sentru viveiru ikan iha Mugis, suku Raifun, ne’ebé daudaun ne’e prepara hela fini ikan Nila hamutuk rihun 15 atu distribui ba komunidade akuakultór ne’e iha interese atu hadi’ak.
Notísia relevante: MAP instala ona mákina prodús ai-haan ba animál-ikan iha Maubara
Jornalista: Sérgio da Cruz
Editór: Evaristo Soares Martins
