iklan

EKONOMIA, BOBONARO, HEADLINE, MUNISÍPIU

Sentru Viveiru Mugis prepara fini ikan rihun 15 atu distribui ba komunidade

Sentru Viveiru Mugis prepara fini ikan rihun 15 atu distribui ba komunidade

Fini Ikan Nila iha sentru Viveiru Ikan Mugis, suku Raifun, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 11 juñu 2024 (TATOLI) – Sentru Viveiru Ikan iha Mugis, suku Raifun, postu administrativu Maliana, munisípiu Bobonaro, daudaun ne’e prepara ona fini Ikan hamutuk rihun 15 atu distribui ba komunidade no grupu akuakultór sira ne’ebé iha interese ba hakiak.

Xefe seksaun Sentru Viveiru Ikan Mugis, Celestino Manu Laca, hateten distribuisaun ne’e bazea ba pedidu husi komunidade no grupu akuakultór sira no fini ne’ebé disponivel kompostu husi espésie nila-mean, kinur no metan no ikan-mas.

Nia subliña, molok apoia ekipa sira sei tún ba terrenu, halo identifikasaun kolam ho fonte bee no apoia ne’e depende ba medida kolam ne’ebé prienxe ona kritéria atu halo atividade hakiak ikan.

Notísia relevante: Sentru produsaun iha munísipiu prodús ikan kada tinan milliaun ida

“Ita agora prepara fini rihun 15 pés mak agora daudaun iha kolam laran, ita hein hela proposta komunidade no grupu akuakultór sira, ha’u rekomenda ba komunidade sé mak iha kolam hakiak ikan hato’o proposta mai,” nia ko’alia iha Mugis, tersa ne’e.

Jestór Sentru Viveiru ne’e haktuir, iha tinan hirak ba kotuk komunidade no grupu sira iha interese boot atu hakiak-ikan, maibé iha tinan ne’e menus tanba to’o agora foun simu pedidu ida husi komunidade.

Tanba ne’e Sentru Viveiru Mugis planu ba oin sei halo identifikasaun ba Lagoa sira eziste iha munisípiu Bobonaro iha área rurál ne’ebé dook husi área kosteira.

“Ba oin ne’e ita bele halo atividade kolleta, ema hotu-hotu bele asisti, sé mak hakarak han ikan fresku bele ba, tanba governu nia hakarak kada uma-kain tenke konsumu ikan, mas ne’e depende ba interese komunidade,” nia katak.

Enkuantu Governu liuhusi Ministériu Agrikultura, Pekuária, Peska no Floresta estabelese sentru viveiru ikan ne’e ho prinsípiu atu hakiak, haboot, habarak no distribui produsaun ikan ba komunidade no grupu akuakultór sira iha munisípiu Bobonaro inklui munisípiu sira seluk ne’ebé presiza.

Notísia relevante: SEP kolleta ikan Nila iha Vemasse

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!