EKONOMIA, BAUCAU, HEADLINE, MUNISÍPIU

SEP kolleta ikan Nila iha Vemasse

SEP kolleta ikan Nila iha Vemasse

Sekretáriu Estadu Peska, Domingos da Conceição dos Santos, kolleta Ikan Nila iha suku Vemasse Tasi, postu administrativu Vemasse, sesta (07/06). Imajen Agência TATOLI/Natalino Belo.

BAUCAU, 07 juñu 2024 (TATOLI) – Sekretáriu Estadu Peska (SEP), sesta ne’e kolleta ikan Nila hamutuk kilograma 1.983 iha suku Vemasse Tasi, postu Administrativu Vemasse, munísipiu Baucau

Sekretáriu Estadu Peska, Domingos da Conceição dos Santos, esplika, ikan hirak-ne’e kolleta hafoin Governu iha inísiu tinan-ne’e apoia fini ikan hamutuk rihun-ida-resin ba grupu hakiak ikan iha suku Vemasse.

“Agradese ba sira, tanba kuidadu ikan ne’e bele iha kresimentu di’ak, fulan tolu de’it kolleta ona,” Sekretáriu Estadu Peskás hateten iha Vemasse, sesta ne’e.

Politika IX Governu konstitusionál liuhusi Ministériu Agrikultura, Pekuária, Peska no Floresta, apoia fini ikan ba grupu komunitária hotu ho objetivu atu povu bele konsume hahan nutritivu hanesan ikan Nila.

Alende ne’e, Governu investe liuhusi grupu komunitária hanesan parte aumenta kuantidade ikan iha Timor-Leste, apoia merenda eskolár inklui bele redus ikan importadu husi estranjeiru.

“Ita seidauk halo levantamentu maibé ha’u konsege perkore ona, ita-nia hakiak nain sira antuziasmu atu hakiak,” Domingos dos Santos akresenta.

Governante ne’e husu atu grupu hakiak ikan hotu atu kontinua esforsu liuhusi hakiak ikan tanba bele ajuda aumenta rendimentu uma-kain no redús taxa dezempregu iha Timor-Leste.

Administradór postu administrativu Vemasse, Elda Maria Vegas de Sousa Freitas, fundamenta, ikan ne’ebé kolleta iha Vemase parte atu motiva komunidade nune’e liuhusi ikan bele fo rendimentu ba família.

“Presiza dezenvolve nafatin área ekonomia nune’e hadi’a di’ak liután komunidade nia moris,” Elda Freitas hateten.

Ikan Nila ne’ebé kolleta antes ne’e grupu komunitária iha suku Vemasse Tasi hetan apoia fini ikan hamutuk kabexa 1.800 inklui ho hahan nune’e hafoin fulan-tolu kolleta ho totál kilograma hamutuk 1.983.

Jornalista   : Natalino Belo 

Editór         : Evaristo Soares Martins

iklan
iklan

Leave a Reply

iklan
error: Content is protected !!