DILI, 18 jullu 2024 (TATOLI)- Primeiru-Ministru (PM), Kay Rala Xanana Gusmão, relata, daudaun ne’e halo hela preparasaun másimu ba loron konsulta populár ka referendu 30 Agostu ne’ebé selebra ba dala-25, signifikante hodi valoriza povu hotu nia sakrifísiu ne’ebé kontribui ona ba auto-determinasaun Timor-Leste nian.
“Ha’u mai ko’alia ho Prezidente Repúblika kona-ba Governu halo preparasaun másimu tebes ba komemorasaun 30 agostu ne’ebé kompleta tinan 25, ida ne’e signifikante tebes hodi valoriza ita nia inan aman sira sakrifísiu hodi determina Timor-Leste nia independensia husi votasaun,” Primeiru-Ministru hateten hafoin ramata enkontru semanál ho Xefe Estadu José Ramos Horta iha Palásiu Prezidensiál, kinta ne’e.
Komemorasaun 30 Agostu tinan ne’e importante ba istória Timor-Leste nian no sei partisipa mós husi Sekretáriu Jerál Organizasaun Nasaun Unidas (ONU), António Guterres, Eis Xefe Misaun UNAMET iha Timor-Leste, Ian Martin no konvidadu seluk tan.
“Ho nune’e mak ha’u ho Prezidente Repúblika diskute kle’ur uitoan kona-ba preparasaun sira hotu, no ko’alia mós kona-ba vizita Amu Papa Francisco nian iha fulan Setembru. Ita fiar katak povu tomak sei kontente ho komemorasaun 30 agostu no vizita Amu Papa nian,” nia konklui.
Tuir nia, eventu hirak ne’e responsabilidade Governu no ema hotu nian tanba ne’e husu ba parte hotu atu kontribui hametin pás iha Timor-Leste hodi ultrapasa eventu rua ne’e ho susesu.
Notisia relevante:Sekretáriu Jerál ONU konfirmadu partisipa komemorasaun loron konsulta populár
Jornalista: Hortencio Sanchez
Editór : Florencio Miranda Ximenes
