UPF no TNI iha ona koordenasaun hodi asegura fronteira iha vizita Papa Francisco
DILI, 18 Jullu 2024 (TATOLI) – Polísia Nasionál Timor-Leste (PNTL), liuhusi Unidade Patrullamentu Fronteira (UPF) no Tentara Nasional Indonesia (TNI) iha ona liña koordenasaun atu halo patrullametu konjunta iha fronteira Mota-Ain no Batugadé iha ámbitu vizita Papa Francisco iha Timor-Leste.
Komandante Unidade Patrullamentu Fronteira, Superintendente Polísia, Euclides Belo, relata katak, iha 19 Jullu 2024, sei partisipa enkontru ida ho autoridade forsa defeza no seguransa Indonézia nian iha postu integradu Mota-Ain hodi ko’alia kona-ba seguransa iha fronteira relasiona ho vizita Papa Francisco nian.
Nia dehan UPF kontinua halo koordenasaun ho TNI atu haree mekanizmu sira hodi aplika iha liña fronteira Mota-Ain no Batugadé, nune’e bele garante seguransa ida di’ak ba vizita Papa Francisco nian.
Ba seguransa nian, PNTL no FALINTIL-Forsa Defeza Timor-Leste (F-FDTL) asina ona akordu operasaun konjunta hodi garante seguransa ida di’ak ba eventu importante referidu.
Notísia relevante: PNTL no F-FDTL formaliza operasaun konjunta “Pombu Mutin” ba vizita Papa Francisco
Tuir Komandante UPF, sira-ninia tarrefa mak apoia seguransa iha liña fronteira, inklui mós iha Aeroportu Internasionál Prezidente Nicolau Lobato nian, tanba UPF mós simu ona sirkulár ida husi dioseze Kupang ne’ebé informa katak parte dioseze ne’e mós sei organiza sira-nia sarani atu partisipa mós misa iha Tasi-Tolu iha vizita Papa nian iha Timor-Leste.
Sirkulár ne’ebé simu ona husi dioseze Kupang ne’e hateten sarani katólika husi Kupang no Atambua ne’ebé atu partisipa misa iha Tasi-Tolu ne’e tenke iha kondisaun saúde di’ak, tenke iha dokumentu kompletu hanesan pasaporte, tenke prepara idaidak ninia orsamentu hodi bele uza iha Timór. Enkuantu, kona-ba sarani na’in hira maka sei tama Timor-Leste, iha sirkulár ne’e la mensiona.
“Tanba ne’e, UPF ho TNI sei diskute asuntu seguransa iha tempu besik ne’e, hodi bele garante seguransa atu iha peregrinasaun sarani sira husi Indonézia, Kupang no Atambua, tama territóriu Timor-Leste iha vizita Papa ne’e bele la’o ho di’ak no bele obedese ba regra seguransa ne’ebé parte rua sei deside”, dehan.
Jornalista: Tomé Amado
Editora: Maria Auxiliadora
