DILI, 19 Jullu 2024 (TATOLI) – Servisu Agrikultura munisípiu Bobonaro hato’o proposta ba Ministériu Agrikultura, Pekuária, Peska no Floresta (MAPPF) hodi husu estensionista na’in-12 atu fó asisténsia ba agrikultór sira iha suku 50.
Diretór Servisu Agrikultura Bobonaro, Loguinhos João, dehan daudaun ne’e sira iha estensionista na’in-47 mak apoia serbisu tékniku ba grupu agrikultór sira iha terrenu, maibé númeru ne’ebé la sufisiente.
“Sira ne’ebé efetivu loos hodi apoia servisu tékniku agríkola ba suku 50 iha Bobonaro ne’e iha de’it na’in-38. Tanba ne’e, ita presiza tan estensionista na’in-12 atu kompleta númeru suku ne’ebé ita iha”, Longuinhos João hateten iha Comoro, ohin.
Ba suku sira ne’ebé falta estensionista, Agrikultura Bobonaro koloka kada estensionista kobre suku rua, nune’e bele akompaña serbisu agrikultór sira-nia hodi tau-matan ba produtu sira ne’ebé mak kuda iha natar no to’os sira.
Tuir dirijente ne’e, desizaun ne’ebé foti ne’e atu reforsa polítika Governu nian ba hasa’e produsaun lokál kada tinan. Tanba ne’e, maske ema la sufisiente, maibé tékniku sira ne’e kumpre desizaun no sira halo duni serbisu hamutuk ho komunidade.
“Ita koloka ita-nia tékniku sira ne’e ba rai ne’ebé potensiál ba natar hanesan iha Maliana, nune’e bele apoia agrikultór sira hodi hasa’e produsaun”, realsa.
Planu atu aumenta estensionista na’in-12 ne’e tau ona iha programa 2025 nian no rekrutamentu ne’e sei halo iha munisípiu.
Iha fatin hanesan, Diretór Nasionál Estensaun no Formasaun Agríkola, Hipólito da Costa, relata katak asuntu kona-ba falta estensionista, ministériu tau ona iha konsiderasaun, tanba ne’e planu atu aumenta númeru estensionista sira sei hala’o iha tinan oin.
“Ita husu ona ba Diresaun Servisu Agrikultura iha munisípiu sira atu kontinua halo jestaun ruma ho limitasaun númeru estensionista ne’ebé iha hodi bele atende preokupasaun agrikultór sira-nian bainhira enfrenta difikuldade ruma”, salienta.
Iha enkontru ba planu asaun anuál 2025 ne’e, ministériu husu ona ba Servisu Agrikultura kada munisípiu atu halo identifikasaun ba númeru estensionista hira mak presiza atu aumenta, nune’e bele prepara planu ida di’ak hodi loke vaga iha tinan oin.
Notísia relevante: Servisu Agrikultura Liquiçá presiza estensionista na’in-20
Jornalista: Tomé Amado
Editora: Maria Auxiliadora
