VIQUEQUE, 19 jullu 2024 (TATOLI)- Bee Timor Leste, Empreza Públika (BTL,E.P) munisípiu Viqueque, iha trimestre daruak ne’e konsege arrekada reseita ho totál hamutuk $6,428.05 ba kofre Estadu.
“Reseita sira-ne’ebé ami rekolla no deposita ona iha Banku Nasionál Komérsiu Timor Leste (BNCTL, sigla portugés) ba trimestre daruak nian hamutuk $6,428.05. Husi reseita sira-ne’e ita-nia kliente sira kada fulan selu tuir númeru kontadór iha edifísiu BTL,E.P, hafoin ami ba hatama iha banku”, Koordenadór BTL,E.P munisípiu Viqueque, Marito da Costa, hateten ba Agência TATOLI, iha ninia kna’ar fatin, Beloi, ohin.
Maske, nia dehan to’o agora servisu BTL,E.P iha munisípiu seidauk atinje terjetu monta metru kontadór ba kada uma-kain sira purvolta 1.094, maibé to’o iha trimestre daruak ne’e konsege monta ona ba uma-kain 500.
Metru kontadór ne’ebé monta ona ne’e hahú husi área Beskem, zona Beloi, Mersida, Kabira-Oan, Sokobira, Tekalaran no Lamaklaran iha suku Caraubalo, postu Viqueque Vila.
“Ami mós detata komunidade balun halo ligasaun bee ilegál no uza sanio. Nune’e ami buka tuir konsege deteta hodi tesi kotu kanu ilegál sira ho obrigatóriu no ami haruka sira ba iha bakaun BTL,E.P hodi rejista sai kliente BTL,E.P nian hafoin ekipa sira ba instala fali”, nia afirma.
Iha tinan ne’e, sei akontese mudansa klimátika ka bai-loron ne’ebé ameasa tebes ba bee matan Loihunu tanba debitu bee atuál menus ba litru 80 pur segundu (LPS), kompara ho tempu udan ho debitu LPS 90.
“Ho ida-ne’e, ha’u sente katak bailoron naruk ne’e sei impaktu ba rekursu bee matan Loihunu hahú menus. Ami-nia predisaun posibilidade to’o fulan Outubru debitu bee sei menus liután. Sei fó impaktu ba ita-nia kliente kosumidór sira ne’ebé maka hela iha kapitál Viqueque laran sei hasoru krize ba bee-moos”, nia relata.
Tanba rekursu bee ne’ebé atu reforsa ba rekursu bee-matan Loihunu laiha no durante ne’e dependénsia ba bee matan referisu ne’ebé akontese bai-loron naruk impaktu maka’as ba komunidade sira.
Iha trimestre dahuluk arrekada reseita $4,712,35 mak iha Janeiru rekolla $2.092.75, Fevereiru $1.092.40 no Abríl $1.527.20.
Entretantu, ba trimestre daruak arrekada $6,428,05, kompostu husi Marsu rekolla reseita $1.079.65, Maiu rekolla $1.492.80 no Juñu rekolla $3.855.60. Nune’e iha Jullu ne’e konsege rekolla $1.829.80.
Daudaun ne’e, rekursu ka funsionáriu iha BTL,E.P munisípiu Viqueque na’in-14 hodi halo atendimentu bee-moos ba komunidade sira.
Jornalista : Vitorino Lopes da Costa
Editór : Florencio Miranda Ximenes
