DILI, 19 jullu 2024 (TATOLI) –Ekipa téknika husi Ajénsia Dezenvolvimentu Nasionál hamutuk ho Sekretária Estadu Komunikasaun Sosiál no jerente mída halo observasaun ba fatin ba jornalista sira halo kobertura iha misa solene ne’ebé Papa Francisco prezide iha Tasi-Tolu, iha 10 setembru 2004, iha tuku 16h30.
Tékniku ba konstrusaun altar Tasi-Tolu husi Ajénsia Dezenvolvimentu Nasionál (ADN), Francisco Xavier, hateten ADN hatudu fatin hanesan sentru mídia ba jornalista sira no operadór telekomunikasaun atu fasilita sira hodi bele halo kobertura ba eventu istóriku ne’e.
“Ami la’o tuir orientasaun ne’ebé mai husi komisaun, pozisaun tuir dezeñu ne’ebé aprova ona husi ekipa vatikanu no komisaun altu nível Timor nian rasik. Ohin loron, atividade ida-ne’e ho kolega midia sira hotu no Sekretária Komunikasaun Sosial (SEKOMS) atu observa lai fatin ne’ebé ita-boot sira hamriik atu ba servisu mídia nian, tuir deenu ne’ebé iha,” Tékniku ba konstrusaun Altar Tasi-Tolu husi Ajensia Dezenvolvimentu Nasionál (ADN) ne’e hateten ba jornalista sira, iha Tasi-Tolu, sesta ne’e.
Nia esplika, pozisaun ba mídia sira-ne’ebé halo transmisaun direta, testu ba jornal no online ka kamera-man ba transmisaun direta tuir dezeñu ne’ebé iha maibé SEKOMS mak sei deside di’ak liután.
“Ami ekipa ADN iha ne’e prepara de’it infraestrutura ba ita-boot sira-nia nesesidade. Fatin ba jornalista hakerek hakerek nian no hasai imajen ne’e fatin rua ne’ebé bele akumula ema 100 iha fatin rua,” nia dehan.
Tékniku ne’e hateten, distánsia ba jornalista hakerek ka fatin ba kámra iha metru 100 hodi halo transmisaun direta maibé bele ajusta tuir nesesidade mídia nian, naran katak hetan autorizasaun husi responsável ekipa midia no vatikanu.
“Atividade misa ne’e responsável husi igreja, entaun pozisaun ida-ne’ebé mak ita bele hamrik halo live no pozisaun ida-ne’ebé mak ita tau palku ba jornalista hakerek sira-ne’e, desizaun ne’e tenke husi igreja mós,” nia dehan.
Medida fatin ba jornalista sira halo kobertura ne’e, tuir nesesidade jornalista sira-nian maibé ne’e tenke hetan autorizasaun husi SEKOMS.
Tuir observasaun Tatoli, ekipa hosi igreja, SEKOMS no ADN mak ba hare diretamente fatin no sentru ba mídia hodi ADN bele halo preparasaun.
Nune’e mós, marka prezensa reprezentante hosi operador telekomunikasaun hanesan Telemor Telkomsel no Timor Telekom atu haree fatin hodi bele apoia liña internet ba misa solene iha Tasi-Tolu.
Jornalista : Jesuína Xavier
Editór : Cancio Ximenes
