DILI, 19 jullu 2024 (TATOLI)—Eskola hamutuk 100-resin iha territóriu seidauk hetan lisensamentu hosi Ministériu Edukasaun (ME).
“Kona-ba eskola ne’ebé identifika seidauk hetan lisensamentu kuaze 100 ba leten, ida-ne’e maioria eskola sentru komunitáriu. Ita identifika ona no husu sira halo aplikasaun no aplika ona, maibé kuaze sira la priense kritériu ne’ebé ministériu hasai. Entaun ita devolve hikas ba sira atu kompleta hafoin entrega fali,” Koordenadór Gabinete Avaliasaun Lisensamentu no Akreditasaun (GALA) iha ME, António Tomas Maia, informa ba Agência Tatoli, iha ninia knaar fatin, Vila Verde, sesta ne’e.
Husi eskola hirak-ne’e, iha eskola hitu mak GALA sei atribui sertifikadu lisensamentu ba sira hanesan Pelikan Drum School, nia halo aplikasaun ba nível eskolaridade, katak husi pré-eskolár to’o ensinu sekundáriu nomós eskola katólika balun, Eskola Maria Regina, no seluk tan.
“Sira ne’ebé seidauk hetan lisensamentu ne’e ita identifika iha tinan 2023 no 2024. No tuir dadus ne’ebé ami hetan eskola hamutuk 75, barak liu pré-eskolár no iha ona faze avaliasaun. Posibilidade liu númeru ida-ne’e tanba ita seidauk halo identifikasaun hotu. Eskola ne’ebé la tuir kritériu ita fó rekomendasaun ba sira nune’e kompleta dadus no eskola sira-ne’e ita kategoria ba eskola privadu hotu,” nia akresenta.
Notísia relevante : ME fó ona lisensa ba eskola internasionál 15
Koordenadór GALA dehan, avaliasaun ida-ne’e bazeia ba dekretu-lei 29, ne’ebé ko’alia kona-ba rejime jurídiku ba lisensamentu avaliasaun no akreditasaun, ne’ebé iha padraun no diploma ministeriál númeru 8/2016, ko’alia kona-ba estabelesimentu eskola ho padraun tolu mak hanesan infraestrutura no fasilidade, pedagógiku, no jestaun eskolár.
Kada padraun iha nia kritériu, hanesan kuandu estabelese eskola ida tenke iha fasilidade atu nune’e ema ne’ebé eskola bele garantidu no seguru, saudável no equitável.
“Kuandu la priense sei iha mós sansaun hanesan, kuandu ita prosesu la tuir kritériu, ne’e ita fó fila hodi kompleta maibé kuandu kontinua to’o futuro mak nune’e nafatin, ita halo uluk rekomendasaun hodi kompleta depois nafatin la kompleta foin ita foti sansaun ba sira mak sei taka eskola ne’e,” nia esplika.
Daudaun iha eskola hamutuk 1.800-resin ne’ebé hetan ona lisensamentu husi tinan 2015 to’o 2023 ba nível eskolaridade iha territóriu.
Jornalista : Osória Marques
Editora : Julia Chatarina
