Manán Buradu 3-1, Coach Eleven sai terseiru lugár iha kopa Xanana
DILI, 19 jullu 2024 (TATOLI) – Ekipa Coach Eleven susesu sai terseiru lugar iha kopa Maun Boot Kay Rala Xanana Gusmão, bainhira manán nia adversáriu Buradu FC ho rezultadu 3-1.
Iha sesta loraik ne’e, ekipa Eleven no Buradu kompete hodi buka hadau malu se loos mak atu hetan terseiru lugar ba kopa Xanana, iha kompetisaun jogu, iha Estádiu munisipál Dili.
Iha jogu ne’e, ekipa rua halo esforsu másimu hodi lori vitória ba idaidak nia ekipa ho fair play.
Iha sesta lokraik ne’e ho euforia adeptu sira, tuir oráriu jogu, apitu dahuluk lian husi Bernardino Mascarinhas husi Dili Timor-Leste, Estádiu Munisipál Dili ekipa adversária rua lansa kedan kontra no atake ba malu tuir tékniku no abilidade ekipa idaidak nian, tuir orientasaun treinadór idaidak, oinsá atu prodús golu.
Iha kompetisaun ne’e, Eleven ho serbisu ekipa ne’ebé di’ak tuir kompeténsia koñesimentu no kapasidade: tékniku, tátika no estratéjia, halo Buradu tenke halo esforsu maka’as.
Maske nune’e, Eleven konsege hatudu jogu bonitu halo Buradu susar atu kombate iha batalla durante jogu la’o iha minutu primeira parte. Nune’e to’o ona minutu 22 Eleven hatudu nia forsa hotu liu husi jogadór Marcos Morais (38) konsege prodús ona golu primeiru hodi muda rezultadu ba 1-0.
Iha kampu kuadradu Estádiu Munisipiu Dili, Buradu mós domina bola hodi halo presaun maka’as iha minutu ba minutu; sutu barak mak avansadu Buradu ezekuta maibé sutu hirak ne’e seidauk kona iha alvu.
Maibé Buradu nunka lakon esperansa, kontinua serbisu ho kalma, nune’e iha minutu 31 jogadór Antonio Marques (11) responde ona golu ida hodi muda rezultadu ba 1-1. Golu ne’e halo Eleven tenke esforsu maka’as liutan nune’e bele kombate Buradu nia jogu nune’e bele aumenta golu.
Minutu primeira parte to’o ona nia rohan, árbitru sira deside fó tan adisionál minutu rua, iha minutu rua ne’e Eleven utiliza ho kuidadu no ikus iha minutu 45+1 jogadór Eleven Expedito Conseição (11) aumenta tan golu ida muda kedan rezultadu ba 2-1.
Ho nune’e husi minutu primeira parte iha minutu 45+2 Eleven mak prodús ona golu rua no Buradu foin golu ida hatur rezultadu ba 2-1 no provijoriu Eleven mak lidera jogu iha minutu primeira parte.
Dolar ba segunda parte ekipa rua nafatin lansa kontra no atake ba malu ho velosidade maka’as ho ambisaun atu hatama lalais golu nune’e bele manán jogu ne’e ou halo empata jogu ne’e.
Buradu halo esforsu oioin oinsa hamate Eleven nia jogu, maibé esforsu hirak ne’e hela de’it hanesan esforsu tanba nunka prodús golu.
Eleven hala’o jogu ho estratejia ne’ebé bonitu. Konsege domina bola, nune’e iha 61 jogadór João Pedro (22) lansa tan golu ida muda kedan rezultadu ba 3-1. Golu ne’e halo Buradu dada iis naruk no susar atu reziste.
Esforsu hotu Buradu halo maibé difisil atu kombate. Eleven joga ho kalam hodi hein minutu normal husi minutu 45 segunda parte termina bele manán jogu ne’e.
Ikus árbitru hú duni árbitu lian iha minutu 90+3 hodi termina jogu ba ekipa rua, Eleven mak ekipa ida ne’ebé iha direitu absoluta ba hetan terseiru lugár kopa Xanana. Enkuantu Buradu okupa de’it iha kuartu lugár. Manán na’in ba terseiru lugár sei simu osan hamutuk $ 3,000 no kuartu lugár sei simu $2,000.
Entretantu ba jogu hadau malu primeiru lugár sei akontese aban 20/07 iha Estádiu Munisipál Dili tuku 16:00 to’o remata. Iha ne’ebé sei kontra malu entre Laisorulai FC ho Warikoan FC, iha jogu ne’e se mak sai manán na’in dala uluk sei simu osan hamutuk $8,000 no segundu lugár 4,500.
Notísia relevante:Halakon Buradu FC, Laisorulai sei kontra Warikoan iha finál kopa Xanana
Jornalista: Hortencio Sanchez
Editór: Florencio Miranda Ximenes
