PM husu MOP hapara konstrusaun estrada Alas-Wedaberec Manufahi
DILI, 19 jullu 2024 (TATOLI)—Primeiru-Ministru (PM), Kay Rala Xanana Gusmão husu ba Ministériu Obra Públika (MOP) orienta empreza responsável hapara projetu reabilitasaun estrada husi suku Wedaberec, aldeia Meti-Oan ba to’o postu administrativu Alas, munisípiu Manufahi.
“Estrada ne’e momentu ha’u rasik mak ba hatuur fatuk dahuluk no ha’u rasik husu ba sira katak projetu ne’e la’o mak hetan impedimentu husi sé de’it ita sei kansela, horiseik ha’u rona katak iha duni impedimentu husi grupu balun, ohin hasoru malu ho Primieiru-Ministru, ha’u mós aproveita fó hatene, Primieiru-Ministru husu ha’u haruka hapara empreza kaer projetu retira ekipamentu husi ne’ebá muda bá fatin sira ne’ebé ema presiza,” Ministru Samuel Marçal, hateten, hafoin relata progresu serbisu ba PM, iha Palásiu Governu, sesta ne’e.
Reabilitasaun estrada husi suku Wedaberec, aldeia Meti-Oan to’o postu administrativu Alas, munisípiu Manufahi ho naruk kilómetru 23 kilometru, ne’ebé hatuur ona fatuk dahuluk iha loron 14 juñu 2024.
Notisia relevante : MOP tau fatuk dahuluk ba reablitasaun estrada Wedaberec ba Alas
Ministru dehan, loloos komunidade iha suku Wedaberec tenke kontente tanba hetan oportunidade uluk husi Governu hodi hadi’a sira-nia estrada hodi fasilita asesu ba merkadu.
“Momentu hatuur fatuk dahuluk ha’u hateten ona ba lia-na’in, autoridade lokál no komunidade katak bainhira iha impedimentu ruma, imi rasik mak tenke rezolve, maibé la rezolve mak projetu kansela muda bá fatin sira ne’ebé ema presiza, ohin ha’u sei bolu empreza retira husi fatin ne’ebá,” nia tenik.
Tuir governante ne’e, razaun iha grupu balun halo impedimentu ba serbisu reabilitasaun estrada ne’e tanba dalaruma iha interese hotu.
“Atu hateten katak empreza ne’ebé daudaun kaer obra ne’e tuir konkursu públiku mak foin kaer projetu referidu. Laiha lei ruma hateten, ida mak tuir konkursu públiku no manán pois ema seluk mak implementa fali, se impede obra husi Governu ne’e krime tanba ita halo susar ema barak no la tolera kontinua, tanba Governu laiha tempu loron-loron halo diálogu ho komunidade ba buat ne’ebé laiha folin pois dezenvolvimentu la la’o,” nia katak.
Projetu reabilitasaun estrada Wedaberec ba postu administrativu Alas responsabiliza husi empreza internasionál Xina ho naran China Nuclear Industry 22nd Construction Co, Ltd ho totál orsamentu millaun $13,8.
Jornalista : Arminda Fonseca
Editora : Julia Chatarina
