Manán iha penalidade hasoru Warikoan, Laisorulai konkista vitória iha Kopa Xanana 2024

DILI, 20 Jullu 2024 (TATOLI) – Iha sábadu lokraik ne’e, Estádiu Munisipál Dili nakonu ho ema uain husi munisípiu Baucau no Viqueque. Sira mai tanba objetivu ida, hakarak ida. Atu haree de’it sira-nia klubu favóritu rua ne’ebé kompete malu hodi hadau sai primeiru lugár iha Kopa Maun Boot Kay Rala Xanana Gusmão 2024.

Ekipa rua ne’e mak Laisorulai FC, husi Baucau no Warikoan FC husi Viqueque.

Iha kompetisaun finál ne’e lori ekipa Laisorulai sai manán-na’in dahuluk iha kopa Maun Boot Kay Rala Xanana Gusmão, bainhira halakon nia adversáriu Warikoan ho sutu penalidade 4-2.

Iha jogu ne’e ekipa rua halo esforsu másimu hakarak lori vitória ba idaidak nia ekipa ho fair play

Hahú ho apitu dahuluk lian husi árbitru Pedro Carvalho, iha Estádiu munisipál Dili, ekipa adversária rua lansa kedan kontra-atake ba malu tuir tékniku no abilidade ekipa idaidak nian, tuir orientasaun treinadór idaidak, oinsá atu prodús golu.

Iha kompetisaun ne’e, Laisorulai ho serbisu ekipa ne’ebé di’ak tuir kompeténsia, koñesimentu no kapasidade téknika, tátika no estratejia, halo Warikoan tenke esforsu maka’as.

Maske nune’e, Warikoan mós konsege hatudu jogu bonitu hodi halo Laisorulai susar atu kombate iha batalla durante jogu la’o iha minutu primeira parte nian. Jogu sai rame liután bainhira treinadór Laisorulai, Edmundo da Costa Pires, halai bá-mai iha kampu ninin hodi orienta jogadór sira halo presaun másima, nune’e labele lakon bola.

La’ós Laisorulai nia treinadór de’it, maibé iha kampu ninin sorin hamriik metin mós husi treinadór Warikoan, Nilton Pinto, ko’alia ho kalma ba nia jogadór sira atu joga tuir saida mak nia haraik ona ba sira.

Iha kampu kuadradu Estádiu Dili, ekipa rua domina bola hanesan hodi halo presaun maka’as ba malu husi minutu ba minutu, sutu barak mak avansadu Laisorulai no Warikoan ezekuta, maibé sutu hirak ne’e seidauk kona iha alvu.

Nunka lakon esperansa, ekipa rua ne’e kontinua joga ho kalma, maske iha minutu ba minutu rezultadu nafatin hatuur 0-0.

Minutu primeira parte to’o ona nia rohan, árbitru sira deside fó tan adisionál minutu ida, iha minutu ne’e jogadór sira la aproveita ho di’ak, ikus tenke termina jogu ho rezultadu empata.

Hakat ba segunda parte, ekipa rua nafatin lansa kontra-atake ba malu ho velosidade maka’as, ho ambisaun atu hatama lalais golu, nune’e bele manán jogu ne’e ou halo empata jogu ne’e.

Warikoan halo esforsu oioin oinsá hamate Laisorulai nia jogu, maibé esforsu hirak ne’e hela de’it hanesan esforsu tanba nunka hatama golu.

Laisorulai mós hala’o jogu ho estratejia ne’ebé bonita. Konsege domina bola, maibé sempre falla iha finalidade iha guarda-rede Warikoan, Zenios Marciano (1), tanba hamriik ho firme hodi salva sutu ne’ebé avansadu Laisorulai lansa. Laiha diferensa mós ba baliza Laisorulai, Timótio Cabral, ne’ebé sempre firme no antesipa di’ak hodi salva bola barak ne’ebé ameasa husi avansadu Warikoan.

Esforsu hotu ekipa rua halo maibé difísil atu prodús golu. Tanba ne’e, ekipa Laisorulai hahú joga ho kalma hodi hein minutu normál husi minutu 45 segunda parte nia termina hodi hakat ba sutu penalidade, tanba jogadór hotu tau konfiansa ba sira-nia guarda-rede.

Jogadór Warikoan halo atake ne’ebé másimu oinsá bele prodús golu, maibé defeza Laisorulai ne’ebé lidera husi Filomeno Junior (18) ho nia kolega sira la fó fatin ba avansadu Warikoan atu halo golu tuir sira-nia hakarak.

Warikoan la konsege kapitaliza sira-nia vantajen jogadór nian iha minutu ba minutu. To’o segunda parte remata score mantein 0-0. Jogu kontinua kedas ho penalidade. Jogadór Warikoan na’in-rua la konsege hala’o sira-nia knaar ho di’ak maka lakon ho 2-4.

Iha sutu dahuluk jogadór Viqueque oan, Clinton Freitas (14), hala’o nia knaar ho susesu hodi lidera uluk score sai 1-0.

Iha Laisorulai nia parte Zefrio Soares (12) halo score sai 1-1 hafoin ezekuta sutu penalidade ho susesu. Warikoan besik atu sai eliminadu hafoin Nencio de Jesus (7) nia suta kona baliza Laisorulai nia liman parte karuk no lahalo golu.

Tuirmai Laisorulai nia sutu ba daruak husi Leonito da Costa (20) la konsege blokeadu husi guarda-rede adversáriu nune’e hatuur rezultadu ba 2-1. Serafim Brito (17) husi Warikoan tau hikas fali pontu ba 2-2.

Jogadór Nelson Boavida salva tan Laisorulai hodi suta borus rede Warikoan hodi muda rezultadu ba 3-2. Ikus mai, Warikoan nia sutu datoluk husi jogadór Nelson da Costa (23) nian nunka kona ba iha alvu no bola halai dook liu ba riin leten no fó kedan derrota ba Warikoan, nune’e iha sutu ikus Laisorulai nian ezekuta husi jogadór Martinho da Costa (23) tama liu ba rede laran lori Laisorulai manán ho pontu 4-2.

Husi rezultadu ne’e fó kedan oportunidade ba Laisorulai sai vensedór hodi hetan osan prémiu monetáriu $8.000 ho tasa no Warikoan iha segundu lugár hodi simu osan $4.500.

Iha kopa ne’e mós Coach Eleven mak ekipa ida ne’ebé iha direitu absoluta hetan terseiru lugár, bainhira manán tiha nia adversáriu Buradu FC ho pontu 3-1, iha jogu ne’ebé realiza iha loron 19 Jullu. Manán-na’in ba terseiru lugár simu osan hamutuk $3.000 no kuartu lugár simu $2.000 mak Buradu FC husi munisípiu Lautém.

Jogu finál ne’e partisipa direita husi Primeiru-Ministru, Xanana Gusmão, no bainhira jogu ne’e remata líder ne’e husu ba klube ne’ebé lakon atu kontinua esforsu atu buka esperiénsia hodi hein oportunidade seluk.

“Parabéns ba ida ne’ebé manán ona. Nafatin hatudu jogu ne’ebé di’ak. Ekipa rua ohin ne’e joga kapa’as hotu mak to’o iha sutu penalidade, maibé Warikoan nia guarda-rede ladún di’ak, la salva bola mak Laisorulai hodi manán ne’e. Ne’ebé Warikoan imi lalika triste, ne’e hanesan esperiénsia ida ba imi, prepara imi-nia aan, hodi hein fali oportunidade seluk iha jogu seluk”, Xanana enkoraja.

Bainhira jogu termina, adeptu sira husi parte rua halai tama halo nakonu kampu ho espresaun kontente no hakilar ho lian maka’as, ne’ebé haksolok ne’e la’o iha ámbitu pás tanba laiha ema ruma halo problema.

Notísia relevante: Manán Buradu 3-1, Coach Eleven sai terseiru lugár iha kopa Xanana

Jornalista: Hortencio Sanchez

Editora: Maria Auxiliadora