DILI, 22 jullu 2024 (TATOLI)—Dioseze Atambua iha Timor Osidentál (NTT-Nusa Tenggara Timur), Indonézia, daudaun ne’e rejista ona partisipante hamutuk 646 sei partisipa misa ne’ebé prezide husi Papa Francisco, iha Tasi-tolu, Dili, iha loron 10 setembru.
Sekretáriu Jerál Sentru Pastorál Dioseze Atambua, Yosef M. L. Hello hateten, prosesu rejistu ba partisipante sira taka ona iha loron 16 jullu 2024.
“Rejistu ona ema na’in-646, ho detallu mane na’in-283 no feto na’in-363, ho idade tinan 30 to’o tinan 60 mak sei mai Timor-Leste hodi partisipa misa Amu Papa nian,” Yosef informa ba Agência Tatoli, via telefónika, segunda ne’e.
Notísia relevante : Vatikanu lansa ona oráriu Papa Francisco hala’o vizita pastorál iha Timor-Leste
Antes ne’e, iha loron 09 jullu 2024, Dioseze Atambua iha koordenasaun ho Líder Igreja Arkidioseze Metropolitana Dili atu loke rejistu ba partisipante sira husi Dioseze Atambua atu tuir misa vizita Amu Papa Francisco nian.
Iha kritériu ualu ne’ebé sei aplika ba sarani sira husi Atambua bainhira atu partisipa misa, hanesan:
- Iha pasaporte ne’ebé sei válidu pelumenus fulan-9 ba oin.
- Forma grupu barak iha transporte roda haat (hanesan bus), ho dokumentu kompletu no válidu, la permite atu uza kamiaun ka pick up (Kuota ba kada Parókia determina bazeia ba númeru ema no Parókia nia medida).
- Saudavel fíziku no espirituál, bele la’o ain di’ak ho distánsia kilómetru rua to’o neen (Tibar – Tasi-tolu bá-mai).
- Lori osan mínimu $100 no ekipamentu pesoál nesesáriu inklui konsumu balun bainhira hetan permisaun.
- Partisipante hotu tenke kumpre rekezitulegál Estadu Timor-Leste nian.
- Partisipante sira la’ós ema ne’ebé ‘liman raan’ iha konflitu tinan 1999.
- Partisipante sira husi ajénsia ka instituisaun Governu no TNI/Polri tenke tuir prosedimentu administrativu no ofisiál iha sira-nia ajénsia ida-idak nia laran.
- Rejistu liuhusi Parokia ida-idak nia rekizitu sei diskute iha sesaun koordenasaun sira tuir mai ho parte sira.
Jornalista : Arminda Fonseca
Editora : Julia Chatarina
