DILI, 08 jullu 2024 (TATOLI)—Vatikanu lansa tiha ona oráriu Papa Francisco hala’o vizita Estadu no pastorál iha Asia no Oseania, liuliu vizita Indonézia, Papua Nova Guine, Timor-Leste no Singapura.
Notísia Relevante: Papa Francisco sei prezide misa solene iha Tasi-Tolu iha 10 setembru
“Iha vizita pastorál Papa Francisco ba da-45 ne’e, sei vizita nasaun haat ne’e durante besik semana rua nia laran no fulan-setembru ne’e sai hanesan fulan importante ba sarani sira-ne’ebé daudaun ne’e prepara aan atu simu Papa,” refere portál ofisiál Vatican News ne’ebé Agência Tatoli asesu, segunda ne’e.
Papa Francisco sai husi Roma iha loron 02 setembru 2024 no sei vizita dahuluk nasaun Indonézia iha loron ne’e kedas. Hafoin ne’e, iha loron 06 setembru 2024, Papa Francisco sei hala’o viajen ba Port Moresby hodi vizita sarani sira iha illa Pásifiku, Papua Nova Guine to’o loron 09 setembru 2024.
Husi ne’e, iha loron 09 setembru 2024, Papa Francisco sei voo ba Dili, Timor-Leste, no hala’o vizita Estadu no pastorál durante loron tolu (3) nia laran, no iha loron 11 setembru 2024 ne’e, Papa Francisco hala’o nia vizita pastorál ba ikus nian hodi semo ba Singapura to’o loron 13 setembru no iha loron ne’e kedas Papa Francisco sei fila-fali ba Roma.
Oráriu Papa Francisco vizita Timor-Leste
Iha segunda (09 setembru 2024, iha tuku 11h40 oras Papua Novaguine no oras loloos iha TL ne’e 11h40, Papa Francisco hamutuk ho delegasaun sei voo husi Aeroportu Internasionál Jacksons Port Moresby Papua Novaguine mai Dili-Timor-Leste no tuir oráriu sei to’o iha Aeroportu Intgernasionál Nicolau Lobato, Comoro, iha tuku 14h10.
Antes ne’e, Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten hafoin Papa Francisco to’o iha aeroportu Comoro, Papa ho nia delegasaun sei simu husi Xefe Estadu no Governu no bispu sira iha Timor-Leste, hafoin ne’e Papa sei ba deskansa iha Nunsiatura Apostolika iha Motael, Dili.
“Vizita pastorál ne’e hanesan vizita pastorál ida-ne’ebé la’o dook tebes no kle’ur liu, tanba Papa Francisco tenke vizita Indonézia, Papua Novaguine, Timor-Leste no Singapura. Tanba ne’e, iha aeroportu internasionál Prezidente Nicolau Lobato, Comoro, la simu ho serimónia simu nian ne’ebé kle’ur tanba Papa kolen, nune’e Papa ba liu Nunsiatura Apsotolika iha Motael,” Dom Virgílio Kardeál hateten iha sorumutu ho voluntáriu sira, iha DIT.
Hafoin ne’e, iha tuku 18h00 lorokraik, Papa Francisco ne’ebé hanesan Xefe Estadu Vatikanu nian ne’e sei ba iha Palásiu Prezidensiál Nicolau Lobato, Bairru Pite, hodi hala’o enkontru ho Prezidente Repúblika, José Ramos Horta. Iha oras hanesan, Primeiru-Ministru, Kay Rala Xanana Gusmão, sei hasoru malu ho ninia omologu Kardinal Pietro Parolin, ne’ebé sei la’o durante minutu 20 nia laran.
Iha Palásiu Prezidensiál Nicolau Lobato, iha tuku 19h00 kalan ne’e, Papa Francisco sei lee ninia diskursu ne’ebé partisipa husi Xefe Governu no membru Governu da-sia (IX), sosiedade sivil, korpu diplomátiku no konvidadu sira seluk hafoin fila hikas ba Nunsiatura Apostolika Motael.
Iha tersa (10 setembru 2024), iha tuku 08h45 dadeersan, Papa Francisco sei vizita labarik sira ema ho defisiénsia (moras autis) ne’ebé hela iha orfonatu ne’ebé madre sira husi kongregasaun Asosiasi Lembaga Misionaris Awam (ALMA) mak hamatan, iha Pantai Kelapa, Dili.
Iha tuku 09h30, Papa Fransico sei halo sorumutu ho bispu, padre, madre, diaknu, seminarista no katekista sira iha igreja Imaculda Conceição Katedrál Vila Verde, Dili. Ida-ne’e sorumutu ofisál ho igreja Katólika iha Timor-Leste ne’ebé la’o durante oras ida nia laran no Papa sei halo diskursu.
Notísia Relevante: Membru koru 1.100 partisipa misa solene Papa Francisco prezide iha Tasi-tolu
Iha tuku 10h45, Papa Francisco sei halo sorumutu ho padre na’in-38 husi kongregasaun Jesuita iha Timor-Leste iha rezidénsia Nunsiatura Apostolika iha Motael, Dili.
Iha tuku 16h30 lorokraik, Papa Francisco sei prezide misa solene iha Tasi-Tolu ne’ebé tuir planu sei partisipa husi sarani sira hamutuk 700.000 ne’ebé maihusi dioseze Dili, Baucau no Maliana inklu peregrinu sira husi Nusa Tenggara Timur (NTT)-Kupang-Indonézia no Austrália. Tuir planu, misa ne’e la’o durante oras ida ho balun de’it, no sarani sira simu komuñaun kala la’o minutu 10 nia laran deít.
“Misa labele la’o kle’ur. Sarani sira simu komuñaun ne’e, la’o durante minute 10 de’it. Tanba, iha padre ka madre hamutuk 1.000 no hetan apoiu husi ministru estraordináriu hamutuk 3.000 hodi fahe komuñaun. Iha Tasi-Tolu, sei harii kapeliña simples hamutuk 20 no kada kapela ne’r iha siboriu ka kalis 2.00. Ita iha ona alvu katak padre ida sei fó komuñaun ba ema 150 no hein katak iha minutu lima (5) nia laran ne’e komuñaun bele ramata,” Dom Virgílio Kardeál hateten.
Uha kuarta (11 september 2024), iha tuku 09h30, Papa Francisco sei hala’o sorumutu no sei fó diskursu ba reprezentante juventude katólika husi dioseze Dili, Baucau no Maliana hamutuk 3.000 ne’ebé maihusi kada parokia, no sorumutu ne’e la’o durante oras ida nia laran iha Sentru Konvensaun Dili (CCD, sigla portugés).
Hafoin sorumutu ne’e, iha tuku 10h45, sei halo serimónia despedida iha aeroportu Internasionál Prezdidente Nisolau Lobato, Comoro, Dili, antes Papa Francisco ho delegasaun sei voo ba Singapura.
Papa Francisco vizita nasaun 4 iha Asia no Oseania
Tuir portál ofisial Vatican News haktuir, Papa Francisco sei hala’ o nia vizita pastorál iha Indonézia, Papua Novaguine, Timor-Leste no Singapura iha 2-13 September 2024.
Papa Francisco simu konvite hosi Xefe Estadu no autoridade Igreja atu hala’o vizita pastorál ba da-43 ba estranjeiru. Tuir oráriu, Papa Francisvo sei vou hosi Roma iha 02 setembru no sei fila-fali ba Roma iha 13 setembru 2024.
Santu Padre sei hala’ o nia viajen dahuluk ba Jakarta-Indonézia, iha 03 setembru 2024 no iha Jakarta to’ o 06 setembru 2024. Populasaun Indonézia maiória Musulmanu ne´ebé boot iha mundu no Katólika kuaze populasaun juta ualu (8) ka ekivalente 3,1%
Hafoin ne´e, Papa Francisco sei hala’o vizita pastorál ba Port Moresby, Papua Novaguine no Vanimo iha 06-09 setembru 2024. Populasaun iha Papua Novaguine 32% sarani Katólika ka kuaze ema hamutuk juta rua.
Husi ne´eba, Papa Francisco sei vizita Dili-Timor-Leste durante loron tolu ne´ebe sei hahú hosi iha 09-11 setembru 2024. Timor-Leste maioria relijiaun Katólika ho populasaun 96% ka ema hamutuk juta ida.
Hafoin ne´e, Papa Francisco sei vizita Singapura durante loron tolu hahú hosi 11-13 september 2024. Maizumenus iha sarani Katólika hamutuk 395.000 ne´ebé hela iha Singapura ne´e reprezenta kuaze populasaun 3%.
Entretantu, Papa Francisco halo vizita pastorál mai Timor-Leste ne´e sei akompaña husi bispu no kardeál hamutuk 55 no jornalista internasionál hamutuk ema na’in-85.
Notísia Relevante: Igreja prepara túnika 2.000 no siboriu 4.000 ba ministru estraordináriu
Jornalista : Jesuína Xavier
Editór : Cancio Ximenes
