iklan

SOSIEDADE SIVĺL

Igreja prepara túnika 2.000 no siboriu 4.000 ba ministru estraordináriu

Igreja prepara túnika 2.000 no siboriu 4.000 ba ministru estraordináriu

Objetu litúrjiku hanaran siboriu. Imajen/Espesiál.

DILI, 19 juñu 2024 (TATOLI)–Vise Koordenadór ba Vizita Papa hosi Igreja no atual Pároku Igreja Sano António Motael, Guilhermino da Silva, hateten komisaun organizadora liuhosi igreja prepara objetu litúrjiku hanesan túnika 2.000 no siboriu 4.000 ba ministru estraordináriu sira, atu fahe komuñaun ba sarani sira iha misa solene ne’ebé Papa Francisco prezide iha Tasi-Tolu.

Notísia Relevante: Madre Salesiana responsabiliza halo dekorasaun altar ba misa solene iha Tasi-Tolu

Nai Lulik ne’e hateten, konferensia Episkopal Timorense fó ona avizu hodi halo preparasaun ba ema 4.000, tanba daudaun ne’e halo hela rekrutamentu ba ministru estraordináriu ema 4.000 atu tuir formasaun hodi bele partisipa iha selebrasaun misa ne’e.

“Sira presiza iha vestuáriu no sinál tuir liturjia haruka. Tanba ne’e mak komisaun mós prepara ona túnika sira suku iha Timor ne’e fahe ba komunidade relijioza sira mak suku. Kuaze 80% ne’e preparasaun ba túnika ne’e iha ona,” Vise Kordenadór ba Vizita Papa hosi Igreja no atuál Pároku Igreja Santo António Motael ne’e hateten ba Agência Tatoli, iha Motael, tresa ne’e.

Aleinde ne’e, komisaun organizadora liuhosi igreja prepara mós siboriu 4.000 ba ministru estraordináriu sira.

Siboriu sira-ne’e hameno husi nasaun Indonésia ne’ebé sei hatama mai iha Timor-Leste mensalmente, tanba fásil no lalais hodi bele to’o mai.

“Siboriu rihun haat ne’e nia latama dala ida. Iha fulan-juñu nia rohan ne’e sei tama 1.000, jullu ne’e sei tama dala-rua to’o fulan agustu nia klaran ne’e tama mai no sei tama tan ikus hamutuk 1.000.” nia hateten.

Padre ne’e esplika, siboriu ne’e atu tau santísimu ka Óstina iha laran hodi bele fahe komuñaun ba sarani sira iha misa solene ne’e tuir planu sei preside husi Papa Francisco iha Tasi-Tolu iha 11 setembru 2024.

Notísia Relevante: Papa Francisco prezide misa solene iha Tasi-Tolu, igreja prepara ministru estraordináriu 4.000

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!