DILI, 23 jullu 2024 (TATOLI)–Estudante ativu Universidade Orientál Timor-Lorosa’e (UNITAL) husu ba fundasaun atu troka reitór foun ne’ebé ninia grau akadémiku lisensiatura.
Portavós estudante UNITAL, Julião Pacheco, hateten, bainhira fundasaun la tau atensaun ba asuntu ne’e maka estudante sira sei halo manifestasaun hasoru fundasaun nomós apela ba finalista ensinu sekundáriu sira atu labele kontinua estudu iha universidade ne’e.
“Ho polémika ida-ne’e sai hanesan problema boot ba ami estudante, liu-liu fundasaun la haree hetan sistema universitáriu nian bazeia ba Lei Rejime Carreira dos Docentes nian ne’ebé dehan katak lisensiatura labele hanorin, sa tan asume kargu hanesan Magnífiku Reitór. Ami estudante la konkorda lisensiatura atu asume kargu hanesan Magnífiku Reitór ba mandatu tinan-tolu, tanba lisensiatura la merese hetan asinatura husi nível lisensiatura,” Julião Pacheco hateten liuhusi konferénsia imprensa, iha resintu UNITAL, Becora, tersa ne’e.
Estudante husu ba fundasaun atu aprezenta rekezitu abilidade husi reitór foun tanba sira iha dúvida ho kualidade reitór atuál.
“Se laiha dalan mak ami sei organiza universitáriu iha territóriu tomak, liu-liu finalista sekundáriu sira atu labele asesu iha UNITAL. Ami fó tempu fundasaun durante semana ida atu fó resposta ne’ebé klaru. Se laiha resposta mak ami sei blokeia totál atividade aprendizajen iha fakuldade hotu no kontinua asaun greve hasoru fundasaun,” nia akresenta.
Notísia relevante : UNITAL sei kapasita rekursu umanu ba implementasaun Lei Baze Ensinu Superiór
Portavós dehan, nu’udar estudante sempre respeita reitór no fundadór sira, maibé tenke priense rekezitu bazeia ba padraun akadémiku no nu’udar estudante hamriik neutru no la halis ba parte ida maibé ida-ne’e sai ezijénsia ba estudante sira-nia direitu.
“Desizaun ne’ebé fundasaun foti ami konsidera hanesan fundasaun la’ós uza matan hodi haree maibé deside de’it iha nakukun laran. Ami estudante hotu haree katak reitór atuál laiha kapasidade no responsabilidade tanba daudaun ne’e diploma sira ne’ebé mak gradua iha reitór anteriór nia tempu pendente hela tanba ne’e ami husu reitór atuál atu halo klarifikasaun no justifikasaun ne’ebė justu. Ami husu ba finalista ne’ebé agora prepara hela dokumentu ba graduasaun atu labele gradua tanba iha implikasaun ba diploma no la garante kualidade diploma iha mundu kompetitivu futuru mai,” nia tenik.
Estudante universitáriu sira husu ba Ministériu Ensinu Superiór, Siénsia no Kultura (MESSK) no Ajénsia Nasionál ba Avaliasaun no Akreditasaun Akadémika (ANAAA) atu haree prosesu ne’e tuir dalan legál no prinsípiu kualidade akadémiku nian.
“Haree ba kualidade reitór atuál ne’ebé ho nível lisensiatura bele implika ba kualidade estudante sira-nian, liu-liu atu asina diploma ho nível lisensiatura no masteradu nian. Ho kualidade hanesan reitór atuál bele afeta ba prosesu avaliasaun no akreditasaun universidade nian,” Julião Pacheco, hato’o.
Iha sorin seluk, Reitór UNITAL, Joaquim de Jesus Vaz, husu estudante atu fó tempu ba nia atu ko’alia ho fundasaun hodi haree ba asuntu ne’e.
“Nu’udar sidadaun, sira iha direitu atu halo protestu, maibé mós husu ba sira atu fó tempu semana ida mai ha’u atu haree ba asuntu ida-ne’e,” nia tenik.
Ministru Ensinu Superiór, Siénsia no Kultura, José Honório da Costa Jerónimo, konsidera ida-ne’e hanesan problema interna universidade nian.
Jornalista : Osória Marques
Editora : Julia Chatarina
