VIQUEQUE, 23 jullu 2024 (TATOLI)-Ministériu Agrikultura Pekuária, Peska no Floresta (MAPPF) , tersa ne’e, hala’o lansamentu kuda ai-parapa hun 48.810, iha tasi ibun suku Irabin de Baixo, Postu Administrativu Uatucarbau, munisípiu Viqueque.
Atividade kuda ai-papara ne’e nu’udar asaun hodi selebrasaun loron mundiál ba ai-parapa, ne’ebé monu iha loron 26 jullu, ho tema “Kuida ai-parapa hodi hametin rezilénsia hasoru alterasaun klimátika”.
Atividade kuda ai-parapa ne’e partisipa direta husi Ministru, Marcos da Cruz, Sekretáriu Estadu Floresta (SEF), Fernandinho Veira, Vise Ministru Obras Públika (MOP), Prezidente Autoridade Munisípiu Viqueque no funsionáriu Servisu Agrikultura Munisípiu Viqueque.”
“Loron ohin, sai loron importante ba ita hotu hodi komemora loron mundiál ba ai-parapa, nune’e Governu iha komitementu hakarak dezenvolve ai-parapa, maka agora reabilita ai-parapa no konserva iha área kosteira ne’e purvolta rihun 9, maibé hetan estragu hahú husi tempu okupasaun Indonézia to’o agora”, Sekretáriu Estadu Floresta (SEF), Fernandinho Veira, hateten ba jornalista sira, hafoin ramata kuda ai-parapa , iha tasi ibun, suku Irabin de Baixu, ohin.
Papél Governu nian iha obrigasaun hodi halo reabilita no konserva ai-parapa sira-ne’ebé moris iha rai kosteira sira-ne’ebé sai ameasa ba laloran tasi, nune’e labele afeta ba komunidade sira-ne’ebé hela besik.
“Ami kuda ai-parapa oan ne’e 48.810 ne’ebé ita kuda iha rai ektare lima. Depois ida-ne’e ita sei kontinua kuda iha área konsteria Uatucarbau ne’ebé seidauk kuda. Hodi ita promove ai-parapa ba ekonómia verde. Tanba ai-parapa nian funsaun mak atu absolve ba osejeniu (O2) no ai-parapa hodi proteje laloran tasi fó no sai habitat ba biodiversidade sira”, katak Governante ne’e.
Governu sei haree ba minisípiu sira-ne’ebé sai tarjetu atu kuda ai-parapa hanesan Líquica, Dili, Viqueque, Covalima, Manatuto, Bobonaro, Baucau no Lautem iha área kosteira.
Aleinde kuda ai-parapa nia dehan, Governu sei kontonua sensiblizasaun ba komunidade sira hela iha área kosteira hodi labele estraga ai-parapa.
“Ita-nia komunidade iha dever no obrigasaun hodi halo protesaun ba ai-parapa sira-ne’ebé ita kuda ona. Iha ámbitu komemorasaun ida-ne’e ha’u husu ba komunidade no autóridade lokál sira kolabora hamutuk hodi kuida no proteje ba ai-parapa sira”. nia akresenta.
Iha fatin hanesan, Administradór Postu Uatucarbau, Anacleto Doutel Sarmento, husu agradese ba MAPPF no SEF deside komemora loron mundiál ba ai-parapa iha ne’e no kuda ai-parapa iha área kosteira hodi salva guarda no proteje tasi ba komunidade sira iha postu Uatucarbau.
“Ami husu agradese ba MAPPF hamutuk ho komunidade sira selebra loron mundiál ba ai-parapa. Nune’e ba oin ami sei kolabora hamutuk ho lian-nain sira hodi implementa tara-badu, atu ema hotu bele proteje ai-parapa sira-ne’ebé iha postu Uatucarbau”, nia hato’o.
Enkuantu, ba komemorasaun loron mundiál ai-parapa ne’e hetan partisipa mós Embaixadór Uniaun Europeia ba Timor Leste, Diretór Servisu Agrikultura Munisípiu Viqueque, no hetan partisipa másimu husi komunidade, autoridade lokál, estudante sira husi postu Uatucarbau.
Notisia relevante:SEF kontinua dezenvolve Ai-Parapa iha área kosteira
Jornalista: Vitorino Lopes da Costa
Editór : Florencio Miranda Ximenes
