OÉ-CUSSE 23 jullu 2024 (TATOLI) – Provedoria Direitu Umanu no Justisa (PDHJ, sigla portugés) disponibiliza formasaun, entre loron 22 no 27 jullu, ba membru Polísia Nasionál Timor-Leste (PNTL) na’in-26 iha Rejiaun Administrativa Espesiál Oé-Cusse Ambeno (RAEOA) oinsá halo atuasaun iha terrenu hodi respeita sidadaun sira-nia direitu.
Diretora Promosaun Direitu Umanu PDHJ, Marina Bernardina Gaio, hateten objetivu formasaun ne’e mak atu hasa’e koñesimentu membru PNTL sira kona-ba direitu umanu liga ba knaar PNTL nian, nune’e bele hala’o serbisu iha terrenu respeita ba direitu umanu, tanba sira nu’udar autoridade seguransa ne’ebé aplika lei ho respeita ba ema nian direitu.
“Durante PDHJ hala’o nia knaar, iha mós alegasaun balun hasoru autoridade seguransa, liuliu PNTL sira. Tanba ne’e mak liuhusi formasaun ne’e aumenta sira-nia kapasidade no koñesimentu kle’an, nune’e sira bele hala’o atividade tuir regra hodi repeita ba iha direitu umanu”, dirijente ne’e ko’alia iha salaun Edukasaun Oé-Cusse, ohin.
Nia espera katak formandu sira bele hetan informasaun foun no útil hodi pratika iha serbisu loroloron nian, tanba formasaun durante loron lima ne’e sufisiente.
“Iha matéria kona-ba knaar PNTL liga ba direitu umanu, direitu umanu uza forsa, direitu umanu ba halo pasa-revista ka buska bá iha uma, ida-ne’e mak matéria esensiál ne’ebé sira persiza hatene, tanba ne’e liga ba direitu serbisu PNTL nian iha terrenu”, nia dehan.
Inspetór Xefe Polísia Armando Pauf Sila agradese tanba objetivu hudi formasaun ne’e atu fó hanoin filafali ba sira hanesan ajente Estadu ne’ebé ezekuta lei bainhira atu halo atuasaun ba kualkér krime, tenke respeita ema-nia direitu.
Notísia relevante: PDHJ oferese formasaun direitu umanu ba F-FDTL postu Oé-Cusse
Nia salienta baze ne’e haktuir ona iha Konstituisaun RDTL, iha artigu 147 iha pontu daruak, katak asaun hotu tenke tuir lei no respeita direitu umanu.
“Formasaun ne’e, tuir loloos, tenke sai oráriu rotina iha kada tinan atu fasilita informasaun, atu fó hanoin fali ami, katak serbisu maske barak, maibé treinamentu ne’e importante ba ami. Atu sai hanesan buka’e ida ba ezekusaun serbisu iha terrenu”, nia sujere.
Notísia relevante: PPN: PDHJ entrega relatóriu anuál ba PN
Partisipa iha atividade ne’e membru na’in-26 ne’ebé mai husi Polísia Nasionál Timor-Leste (PNTL) no Polísia Unidade Patrullamentu Fronteira (UPF).
Jornalista: Abílio Elo Nini
Editora: Maria Auxiliadora
