OÉ-CUSSE, 23 Jullu 2024 (TATOLI) – Sekretaria Rejionál ba Asuntu Saúde, Rejiaun Administrativa Espesiál Oé-Cusse Ambeno (RAEOA), daudaun ne’e loke konkursu públiku ba pesoál saúde na’in-58 atu koloka ba iha postu no sentru saúde, inklui iha Aeroportu Rota do Sândalo.
Vaga sira-ne’e destina ba médiku, parteira, enfermeira, farmasista, pesoál laboratóriu, saúde públika, finansa no administrasaun.
Sekretáriu Rejionál ba Asuntu Saúde, Luís de Jesus Neno, informa katak rekrutamentu ne’e halo tanba instalasaun saúde sira, liuliu iha área rurál sei falta profisionál saúde atu halo atendimentu ba komunidade.
“Serbisu saúde rejionál daudaun loke hela vaga ba funsionáriu foun. Agora tama ba faze rejistu, depois husi komisaun sei haree sira-nia dokumentu no sei aviza sé mak pasa iha selesaun dokumentu ne’e atu hakat ba teste eskrita. Sé mak liu, faze finál mak teste orál”, Luís de Jesus Neno esplika ba Tatoli, iha Oé-Cusse, ohin.
Dirijente ne’e salienta katak vaga 58 ne’e, inklui pesoál saúde ne’ebé sei koloka iha aeroportu bazeia ba pedidu husi Prezidente Autoridade RAEOA, Rogério Tiago Lobato, hodi prienxe kritériu internasionál katak tenke iha ema saúde iha fatin ne’e.
Tuir dadus, totál funsionáriu saúde iha Oé-Cusse Ambeno hamutuk 350, husi ne’e permanente 156 no restante kontratadu ne’ebé kolokadu iha ospitál referénsia Oé-Cusse, sentru saúde lima no postu saúde 20.
Notísia relasionada: Autoridade RAEOA nomea Fridos Elo lidera Sentru Saúde Oésilo
Jornalista: Abílio Elo Nini
Editora: Maria Auxiliadora
