Autoridade RAEOA nomea Fridos Elo lidera Sentru Saúde Oésilo
OÉ-CUSSE, 05 abríl 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál ba Asuntu Saúde, nomea Fridos Elo nu’udar Xefe Sentru Saúde sub-rejiaun Oésilo, ho mandatu tinan haat 2024 to’o 2028.
Iha sesta ne’e, Sekretáriu Rejionál ba Asuntu Saúde, Luís de Jesus Neno, ofisialmente hala’o serimónia hand over, hodi entrega dokumentu no servisu hosi Xefe Sentru Saúde Sesante, Domingos Neno ba Xefe Sentru Saúde nomeadu Fridos Elo iha sentru saúde Oésilo, hodi kontinua servisu saúde iha sub-rejiaun Oésilo.
“Ohin ita hand over ba kargu xefe sentru saúde Oésilo, hosi dirijente tuan ba foun, kargu ne’e bainbain de’it, tuir lei Funsaun Públika, númeru 08/2004, hateten, kargu ne’e ba ema hotu, tantu feto ka mane, durasaun kargu tinan rua de’it, depois nai-ulun sira halo avaliasaun dezenpeñu, karik di’ak bele kontinua tinan rua kompleta tinan haat, liutiha ne’e, presiza fó fali ba ema seluk,” Luís de Jesus Neno, ko’alia, iha sentru saúde Oésilo.
Notísia relevante: Sekretáriu Rejionál Saúde Oé-Cusse la tolera pesoál saúde abandona serbisu
Eis Diretór Saúde ne’e, fó hanoin ba profisionál saúde sira, hatudu prestasaun hatudu étika profisionál hodi atende komunidade sira ho domin.
“Ita saúde ne’e mesak ida de’it, Governu atu troka malu, maibé saúde ida de’it, serbí povu no serbí nasaun, hakarak ka lakohi, povu iha problema saúde ita iha obrigasaun tenke atende ho domin, hatudu oin midár, labele atende ho hirus, tanba ne’e étika profisionál saúde hatuur ona katak, tenke atende povu ho domin, tanba sira presiza saúde maka mai husu ita-nia apoia.”
Xefe Sentru Saúde nomeadu, Fridos Elo, agradese ba konfiánsa, no perante durante mandatu sei serbisu hamutuk ho entidade tomak hosi suku tolu iha sub-rejiaun Oésilo, nune’e bele garante atendimentu di’ak ba populasaun Oésilo.
“Ohin loron ha’u bele simu konfiánsa tomak ida-ne’e, la’ós ha’u atu servisu mesak, maibé ha’u husu ita bele koopera hamutuk hosi entidade hotu iha sub-rejiaun Oésilo, autoridade lokál sira hosi suku tolu no xefe aldeia 13, ida-ne’e konfiansa mai ha’u, buat todan ida, maibé ha’u tenke koopera nafatin lideransa tomak atubele apoiu ha’u, nune’e bele fó atendimentu saúde di’ak ba komunidade,” nia garante
Notísia relevante:Rogério Lobato husu komunidade apoia jestór foun dezenvolve sub-rejionál Oésilo
Xefe Sentru Saúde Sesante, Domingos Neno, promete sei fó apoia ba lideransa foun, tanba serbisu ne’ebé presta ona, nu’udar matadalan oinsá bele serbisu hamutuk.
“Ha’u hanesan sesante, ha’u prontu sei apoia nafatin hosi kotuk katak ha’u la’ós ema matenek ida, maibé saida maka nia atu halo kontinua ba oin, sasán sira-ne’e ha’u halo liu ona, entaun ha’u bele apoia no hatudu servisu sira-ne’ebé atu halo ba komunidade sira,” nia promete.
Nia konsidera serimónia hand over ne’e hanesan bainbain, tanba dirije servisu sentru saúde Oésilo, durante tinan ualu fulan 11 kna’ar ne’ebé nia simu, tau iha bolsu de’it bainhira ema husu tenke entrega, tanba kargu ne’e ba ema hotu nian.
Notísia relevante:Kuarentena bandu populasaun Oé-Cusse lori sai asu bá munisípiu seluk
Entretantu, totál populasaun iha sub-rejiaun Oésilo hamutuk hamutuk 14.093, mai hosi suku tolu no aldeia 13, hanesan suku Bobometo 8.716, suku Usitasa’e 4.188 no suku Usitaqueno 1.189.
Jornalista: Abílio Elo Nini
Editór: Evaristo Soares Martins
