Top

CNRT apresia SEFOPE fó formasaun lian inglés ba kandidatu traballadór timoroan

SEFOPE liu-husi Diresaun Nasionál Empregu Exteriór, hasai foto hamutuk ba realizasaun programa Pre-Departure Brifing PDB ba kandidatu traballadór Timoroan na'in 80 ne'ebé atu aranka ba servisu iha Austrália. Iha salaun senai Becora, kinta (10/02). Imajen TATOLI/Egas Cristóvão

DILI, 24 jullu 2024 (TATOLI)—Deputadu husi bankada CNRT iha Parlamentu Nasionál (PN), José Virgílio, konsidera sistema Sekretária Estadu Formasaun Profesionál Empregu (SEFOPE) di’ak tebes inísia programa formasaun lian inglés ba kandidatu traballadór timoroan ne’ebé atu ba serbisu iha Austrália liuhusi programa seasonal worker.

“Ha’u, iha ema balun kontaktu katak tuir teste la liu tanba ladun hatene inglés, ne’ebé sei loke fali kursu foun ida iha munisípiu sira hotu. Ne’ebé, hanoin ba tuir iha ne’eba to’o inglés hatene ba compete. Ha’u hanoin sistema ne’eba di’ak tebe-tebes no laiha manipulasaun,” nia hato’o iha intervensaun iha reuniaun plenária komisaun permanente iha sala plenária Parlamentu, kuarta ne’e.

Deputadu husi bankada Governu ne’e fiar katak SEFOPE servisu ho di’ak hodi atende ema hotu ho transparánsia no laiha politizasaun ruma kona-ba prosesu teste ba joven timoroan atu ba serbisu iha Austrália.

Deputadu KHUNTO, António Verdiál de Sousa, preokupa SEFOPE fó sai ona lista naran ne’ebé liu atu ba serbisu iha Austrália no sira-ne’ebé mak la hatene lian inglés mós liu, maibé sira ne’ebé hatene inglés balun la liu.

Sira-ne’ebé pasa, nia dehan,, laiha ona teste entervista no hein bainhira ajénsia sira entervista, maibé prosesu anteriór ne’e maske liu teste eskrita maibé tenke teste orál hodi hatene sé mak hatene inglés loloos mak bele tama sistema work ready pol.

Nia dehan, SEFOPE mós politiza tiha programa seasonal worker no seluk tan, tanba ajénsia husu perfil la fó maibé SEFOPE obriga atu ajénsia sira entervista tuir de’it sá mak SEFOPE fó ba ajénsia, ida ne’e mak ajénsia bele entervista no sai husi ne’e labele, ne’e viola direta ajénsia sira-nia hanesan osan na’in.

“SEFOPE ikus ne’e halo fali hanesan SEFOPE mak osan na’in, la’ós ajénsia mak osan na’in,” nia dehan.

Nune’e, nu’udar reprezentante povu husu Komisaun Anti-Korrupsaun (KAK), Provedória Direitu Umanu no Justisa (PDHJ), Ministériu Públiku no Inspesaun Jerál Estadu atu tun investiga direta prosesu sira-ne’ebé iha.

Entretantu, iha 17 jullu ne’e, SEFOPE fó sai rezultadu korresaun teste eskrita ba vaga online serbisu iha Austrália, ne’ebé hatudu katak aplikante 42.081 hotu liu teste, maibé kandidatu traballadór hafoin halo korresaun matéria fahe ba kategória hitu hanesan excellent, verry good, good, sufficient, poor, verry poor.

Husi kategória hitu ne’e, sira-ne’ebé tama kategoria excellent hamutuk 52, verry good 840, good 6.921, suffisient 8.517, poor 18.931 no verry poor 6.820.

Nune’e, deside katak sira-ne’ebé tama kategoria excellent, verry good no good tama de’it lista prioridade, signifika karik iha demanda ruma husi empregadór mai, sira-ne’e mak sei ba uluk.

SEFOPE fó oportunidade ba sira-ne’ebé tama kategória sufficient, poor no verry poor hodi tuir formasaun lian inglés ba fulan tolu ka fulan neen no bainhira ramata aprezenta sira-nia sertifikadu ba SEFOPE hodi halo entervista liu de’it atu hatene katak sertifikadu lian inglés ne’ebé hetan ne’e to’o iha ne’ebé, nune’e sira hatene sei muda kedas ba kategória tolu hanesan excellent, verry goor no good.

Enkuantu, iha 19 Jullu ne’e, SEFOPE hamutuk ho Fundu Dezenvolvimentu Kapitál Umanu (FDCH) fó asina kontratu ba formadór lian inglés hamutuk 40 hodi dezloka ba munisípiu hotu inklui Rejiaun Administrativu Espesiál Oé-Cusse Ambeno (RAEOA) hodi hanoin kandidatu traballadór sira-ne’ebé aplika ba online, ne’ebé hetan valór sufisiente, poor no very poor ne’e hodi hasa’e sira-nia koñesimentu lian inglés atu muda sira ba kategória excellent, very good no good.

Notísia Relevante: Formadór lian inglés hamutuk 40 hetan kontratu husi SEFOPE

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!