Deputadu Kalohan husu BTL, E.P tau atensaun ba komunidade halerik ba bee-moos
DILI, 24 jullu 2024 (TATOLI)—Reprezentante povu iha uma fukun Parlamentu Nasionál (PN), liuhusi Deputadu PD, António da Conceição “Kalohan’’, husu ba Bee Timor-Leste, Empreza Públika (BTL, E.P) atu tau atensaun ba komunidade liuliu komunidade munisípiu Dili ne’ebé halerik beibeik ba bee-moos ne’e.
“Ha’u hakarak fó hanoin, situasaun agora bailoron hela, komunidade barak mak halerik hela ba bee-moos no halerik mós ba rai-rahun, tanba konstrusaun barak hala’o hela, ida-ne’e afeta hela populasaun sira-nia saúde. Tanba ne’e mak fó hanoin Governu liuliu BTL, E.P atu haree situasaun bee-moos nian iha Dili laran iha tempu bailoron ne’e,” nia levanta liuhusi reuniaun plenária komisaun permanente iha sala plenária Parlamentu, kuarta ne’e.
Situasaun konkreta, nia dehan, iha Aimutin ninian ne’e populasaun sira iha ne’eba menus tebes ba bee-moos, balun hetan no balun la hetan, tanba mós konstrusaun estrada ne’ebé mak la’o hela, halo kanalizasaun kanu sira mós kotu hodi prezudika hela populasaun sira iha ne’eba.
Situasaun hanesan mós ita bele haree fatin barak iha Dili laran, ne’e situasaun ne’ebé kuaze populasaun hotu-hotu lamenta kada tinan.
Tanba agora tempu bailoron, hanoin importante tebes BTL, E.P bele haree serbisu ida-ne’e didi’ak hodi halo kontrolu no bele apoiu saúde populasaun ninian, tnba falta bee-moos ne’e bele prezúdika ba labarik no ema adultu sira.
Deputadu FRETILIN, António Calau, mós ko’alia kona-ba preokupasaun bee-moos tanba kuaze kada fulan deputadu sira levanta hela de’it kestaun bee-moos ne’e, maibé komunidade iha territóriu no iha Dili nafatin halerik ba bee-moos.
“Hanesan fatin barak temi, iha Dili laran hanesan Tasi-Tolu, Aimutin, Manleuana, Bairru Pite, Becora, Cristo Rei kuaze bee laiha. Nune’e, husu Governu nia atensaun ba asuntu bee-moos ne’e,” nia dehan.
Entertantu, iha reuniaun plenária komisaun permanente ne’e reprezentante Governu liuhusi Vise Ministru ba Asuntu Parlamentár, Adérito Hugo da Costa, la marka prezensa maibé tékniku sira de’it mak marka prezensa hodi rejista preokupasaun Deputadu sira-nian, nune’e sei enkamina preokupasaun sira-ne’e ba ministériu tutela atu bele tau atensaun.
Notísia Relevante: Reprezentante povu husu BTL, E.P tau atensaun ba populasaun sosa bee-moos
Jornalista : Nelson de Sousa
Editór : Cancio Ximenes
