DILI, 24 jullu 2024 (TATOLI)—Komísáriu Ezekutivu Servisu Tékniku iha Eletrisidade de Timor-Leste, Empreza Públika (EDTL, E.P), Latino Jerónimo, hato’o parabéns ba aniversáriu ezisténsia mídia estatál, Agência Notisiosa Timor-Leste, Institutu Públiku (Agência Tatoli, I.P) ba daualu (27 maiu 2016).
“Ami hato’o parabéns ba Agência Tatoli ne’ebé sei halo nia aniversáriu ba daualu iha tinan ne’e, ha’u hanoin Tatoli hanesan mídia Estadu nia fontes kredível durante ita akompaña notísia, tanba ne’e husu kontinua dezenvolve di’ak liután no kontinua publika notísia ne’ebé kredível ba públiku,” Latino Jerónimo hato’o ba Agência Tatoli, iha ninia knaar fatin, EDTL, E.P, Caicoli, kuarta ne’e.
Notísia relevante : Diretora INL konsidera produtu Agência Tatoli tuir padraun maibé tenke konsistente
Nia dehan, ho mudansa sira ne’ebé iha, husu atu Tatoli ba oin nafatin públika nótisia ne’ebé di’ak no husu mós lee-na’in sira seluk bele akompaña nafatin mós notísia sira ne’ebé públika iha pájina Tatoli iha rede sosiál facebook (ANTIL) no portál tatoli.tl.
Agência Tatoli, I.P nu’udar ajénsia ofisiál Estadu Timor-Leste nian, ne’ebé ninia ezisténsia mai husi inisiativa Sekretaria Estadu Komunikasaun Sosiál (SEKOMS) iha tinan 2017, nu’udar transformasaun husi East Timor News Agency (ETNA), ne’ebé nakfila ba Ajénsia Notisioza Timor-Leste (ANTIL), no ikus mai sai Agência Tatoli.
Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.
Nune’e, Konsellu Ministru iha marsu 2017, transforma ANTIL sai Agência Tatoli, nu’udar ajénsia ofisiál Estadu Timor-Leste no publika iha Jornál Repúblika, ho estatutu nu’udar Institutu Públiku (I.P).
Objetivu estabelese Agência Tatoli, I.P hodi fontes informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál, bazeia natureza no karakterístika, rapidez no rigór, ne’ebé la ignora rigoroza hanesan akurásia, indepedente, inzenta, klareza no nafatin iha integridade nomós kualidade.
Jornalista : Arminda Fonseca
Editora : Julia Chatarina
