DILI, 24 jullu 2024 (TATOLI)— Juventude no estudante sira husi Postu Alas, iha Dili husu ba Governu liuhusi Ministériu Obra Públika (MOP), atu buka solusaun urjentemente hodi rezolve problema ba kanselamentu estrada Wedauberek- Alas.
“Ami husu ba Ministériu Obra Públika, atu buka solusaun urjentemente hodi rezolve problema kanselamentu ba projetu estrada Wedauberek- Alas. (Kanselamentu) la’os solusaun ne’ebé povu Alas hein no hakarak,” Portavoz Robenciano Fernandes, dehan bainhira halo konferénsia imprensa iha Jardim 5 de Maio, ohin.
Robenciano Fernandes dehan, Juventude no estudante sira husi Postu Alas, husu ba nonu Governu Konstitusionál lideradu husi Primeiru-ministru Kayrala Xanana Gusmão, atu dada fila orientasaun ne’ebé fó ona ba MOP, hodi hapara projetu estrada Wedauberek, Alas.
“Ami husu ba prezidente autoridade Munisípiu no Administradór Postu Alas, atu hala’o audénsia urjentemente ho Sua Exelénsia PM no MOP hodi labele hapara projetu estrada wedauberek Alas. Ami estudante no juventude Alas tomak la satisfeitu ho intervensaun husi Ministru Obra Públiku, Samuel Marçal ne’ebé hateten “Governu laiha tempu atu rezolve problema” Tanba povu deposita konfiansa ba ukun-na’in sira hodi rezolve problema povu nian,” nia esplika.
Tanba ne’e, Estudante no Juventude Alas oan ejizi ba Konsellu Veteranus Munisípiu Manufahi no Postu administrativu Alas, atu toma medida ba grupu ka individu sira ne’ebé uza veteranu nia naran hodi impede projetu Estrada Wedauberek, Alas.
“Ami estudante no juventude Postu Administrativu Alas hakarak afirma, grupu ka individu ne’ebé mak halo inpedimentu ba estrada Wedauberek Alas la reprezenta 11,484 populasaun Alas, ho nune’e ami husu ba Ministru Obra Públika, atu labele hola desizaun hodi retira empreza husi obra kontrusaun estrada diresaun Wedauberek Alas. Ami estudante no juventude Postu Administrativu Alas Kondena aktus ne’ebé mak grupu balun halo hodi fó terus nafatin povu Alas atu labele asesu ba Estrada,” nia afirma.
Portavoz Robenciano Fernandes husu ba MOP atu konsidera ba seremónia kulturál ne’ebé lia-na’in Postu Administrativu Alas, hala’o ona liuhusi halo rituál iha loron lansamentu primeira pedra tanba rituál ne’e sai hanesan konkordansia entre ema ho natureza.
“Atu responde ba hadi’a ekonomia família mak Governu sentrál nia responsabilidade tenke hadi’a infraestrutura sira iha área rurál, remota sira, hodi bele fasilita movimentasaun komunidade ka povu nian ba iha merkadu no buat seluktan ne’ebé ligadu ba sira-nia moris ekonomia maibé, hahú husi ukun aan ne’ebé kompleta ona tinan-22 , maibé iha Governasaun sira liu ba povu Alas sei halerik nafatin ba dezenvolvomentu ba Infraestrutra hanesan estrada ne’ebe prinsipál tebes hodi fasilita sira ba movimentasaun transporte,” nia haktuir.
Iha loron 14 fulan-juñu 2024, Governu, liuhusi Ministru Obra Públiku hamutuk ho Autoridade Munisípiu ManuFahi, Autoridade Postu administrativu Alas, Veteranu, Igreja, Lia-na’in kultura no komunidade husi Postu Administrativu Alas halo ona seremónia lansamentu Primeira Pedra ba Projetu Estrada We Dauberek-Alas.
Iha fatin hanesan, Juventude Alas Manufahi, Nelson de Araújo Fernandes, informa, tuir deklarasaun husi MOP katak razaun halo kanselamentu ba Estrada Wedauberek, Alas, tanba iha grupu balun husi Alas ne’ebé mak lori veteranu nia naran halo impedimentu ba projetu referidu.
“Tanba ne’e hanesan estudante no juventude husi Alas ami la konkorda tebes no ami kondena ba aktu ne’e tanba grupu sira ne’e la reprezenta husi 11,484 populasaun ne’ebé durante ne’e halerik ba dezenvolvimentu liuliu estrada, nune’e ami la konkorda ho hahalok ida ne’e,” Nelson de Araújo konklui.
Lembra fali katak antes ne’e, MOP, hafoin hasoru malu ho Xefe Governu ba jornalista katak hetan orientasaun atu muda fali ba fatin seluk tanba la iha kolaborasaun.
“Primeiru-ministru husu ba ha’u atu Haruka hapara lai kompañia ne’e tanba, tuir loloos sira parte ne’ebá (Alas) kontente husu agradese tanba sira hetan oportunidade primeiru, iha fatin balun aat liu sira seidauk hetan sira ne’ebá mak hetan uluk mas se sira lakohi kolabora, hakarak impede ita bele muda fali ba fatin seluk ne’ebé ema hein hela. Ne’ebé, hato’o ba Primeiru-ministru, Primeiru-ministru mós konkorda atu hapara. Primeiru-ministru fó instrusaun ba ha’u atu hato’o ba kompañia hodi retira lai ekipamentu sira hotu; muda ba fatin seluk,” governante ne’e haktuir.
Entretantu, reabilitasaun Estrada, MOP aprezenta iha reuniaun Konsellu-ministru iha loron 24 janeiru 2024 no Konsellu-ministru desidi delibera hodi autoriza prosedimentu ba aprovizionamentu hodi halo despeza ba reabilitasaun estrada iha munisípiu sira, Pakote 6- Alas ba Wedauberek, Seg.0+000-23+000, ICB/108/MOP-2022.
Kontratór ba implementasaun projetu ne’e mak China Nuclear Industry 22ND Construction Co. LTD (China).
Notísia relevante:PM husu MOP hapara konstrusaun estrada Alas-Wedaberec Manufahi
Jornalista: Felicidade Ximenes
Editór: Rafael Ximenes de A. Belo
