DILI, 24 jullu 2024 (TATOLI)—Ministériu Edukasaun (ME) fasilita formasaun ba superintendente no inspetór eskolár sira hamutuk 108 iha territóriu, nune’e sira bele hala’o serbisu ho di’ak hodi hadi’a sistema no hasa’e kualidade edukasaun iha Timor-Leste.
“Superintendente no inspetór eskolár sira ne’e foin asume knaar. Tanba ne’e, Ministériu Edukasaun presiza fó formasaun atu kapasita liután sira hodi hala’o serbisu iha terrenu ho profisionál. Formasaun ne’e hahú ohin to’o sesta, ho totál formandu hamutuk 108,” Inspetora ME, Maria Manuela Gusmão, informa iha salaun INFORDEPE, Balide, kuarta ne’e.
Totál formandu 108 ne’e kompostu husi munisípiu Aileu hitu, Ainaro ualu, Bobonaro 11, Baucau 11, Covalima 12, Ermera sia, Liquiçá ualu, Lautém sia, Manatuto sia, Manufahi hitu, Viqueque ualu, Rejiaun Administrativa Espesiál Oé-cusse Ambeno (RAEOA) sia, ne’ebé kada munisípiu superintendente ida no restante ne’e inspetór eskolár hotu.
Kada munisípiu iha superintendente ida ho nia inspetór eskolár la hanesan, tanba munisípiu balun inspetór 10 balun 12 no balun ualu.
“Formasaun ne’e ita fó ba sira atubele hatene saida mak sira merese halo durante iha sira-nia mandatu,” nia akresenta.
Liuhusi formasaun ne’e mós prepara formandu atubele hala’o knaar ho efisiente liu, tanba sira ne’e hanesan dirijente foun, maski sira antes ne’e hanesan ona profesór/a ona maibé presiza tan formasaun hodi bele halo monitorizasaun no fiskalizasaun ho di’ak.
“Serbisu ekipa ne’e importante liu atu salva sistema edukasaun iha nasaun ida nia laran. Superintendente sira tenke serbisu hamutuk ho inspetór sira, labele dehan ita mak hatene buat hotu-hotu, konsulta barak atu hariku liután imi-nia koñesimentu. Inspetór no superintendente sira, imi foun iha kargu maibé la’ós foun iha edukasaun, tanba ne’e ba hala’o serbisu ho didi’ak tuir korridór. Inspetór kada munisípiu tenke serbisu iha ekipa nune’e bele hadi’a ita-nia sistema edukasaun ne’e iha ita-nia rain,” nia hato’o.
Notísia relevante : Dirijente ESTV 32 tuir formasaun kona-ba dezenvolvimentu planu estratéjiku eskolár
Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lemos Lopes, hateten, superintendente no inspetór eskolár sira bainhira asume kargu tenke tun ba terrenu hodi hala’o serbisu.
“Simu ona kargu nu’udár superintendente no inspetór eskolár ne’e tenke tun ba terrenu hodi hala’o serbisu la’ós tuur de’it iha uma, tanba tuur iha uma serbisu hotu sei la la’o, tanba ne’e husu ba ita-boot sira tuir formasaun durante loron-tolu ne’e ho didi’ak. Tenke foku nune’e bele sai hanesan bukae ida ba imi atu lori fila ba imi-nia fatin hodi implementa, tanba formasaun sira ne’e sai hanesan matadalan ba ita atu halo serbisu ho di’ak liután,” nia fó hanoin.
Tanba atu halo transformasaun ba rai ida-ne’e presiza entidade hotu tenke serbisu maka’as no serbisu ekipa.
“Ita tenke kolabora ho entidade sira hotu atu nune’e bele hala’o serbisu ho di’ak hodi hadi’a sistema, lala’ok sira ne’ebé durante ne’e falla ita tenke hadi’a,” governante ne’e enkoraja.
Sekretáriu Estadu rekoñese, papél inspetór importante tanba inspetór sira mak sei halo kontrolu, fiskalizasaun no monitoriza saida mak akontese iha eskola ida.
“Tanba ne’e, superintendente sira fó serbisu ba imi-nia inspetór sira, semana-semana tenke halo avaliasaun ba serbisu sira ne’ebé mak iha, atu nune’e ita hatene saida mak akontese iha eskola, estudante sira aproveita didi’ak iha eskola ka lae, ne’e inspetór sira tenke kontrolu. Inspetór sira fahe serbisu halo didi’ak hodi hatudu rezultadu di’ak durante mandatu, labele haree liu de’it saida mak ladi’ak maibé bá atu fó hanoin hodi hadi’a ida-ne’ebé ladi’ak ne’e sai di’ak para hadi’a di’ak liután, mellora di’ak liután sistema edukativu iha ita-nia rai,” nia hameno.
Superintendente munisípiu Baucau, Francisco Batista, komprometidu sei serbisu hamutuk ho inspetór eskolár sira nune’e bele hala’o serbisu hotu iha terrenu ho susesu.
“Ita sei la’o tuir manuál orientasaun ne’ebé iha, tanba iha manuál ne’ebá hateten katak serbisu tenke ekipa nune’e nafatin la’o iha korridór ida, se ita ida-idak la’o tuir ita-nia, ha’u hanoin ita sei la susesu iha serbisu hotu,” nia tenik.
Inspetór eskolár ba postu administrativa Bazartete, munisípiu Liquiçá, Saturnino da Silva, hateten, nu’udár inspetór foun presiza duni tuir formasaun atubele hala’o serbisu ho di’ak iha terrenu.
“Ami sira ne’e hanesan inspetór foun, nune’e formasaun hanesan ne’e bele eleva ami-nia koñesimentu para ami bá serbisu iha terrenu ho di’ak. Ami sei la’o tuir orientasaun hotu ne’ebé iha ou matadalan ne’ebé iha, ita labele serbisu tuir ita-nia hakarak tanba manuál mak orienta ita atu serbisu hamutuk ho ekipa,” nia salienta.
Jornalista : Osória Marques
Editora : Julia Chatarina
