DILI, 25 jullu 2024 (TATOLI)—Asosiasaun Halibur Defisiénsia Matan Timor-Leste (AHDMTL), rekomenda Agência Tatoli kobre ba Ema ho Defisiénsia (EhD) ne’ebé vulnerável liu iha sosiedade.
“Ho biban ne’e, ha’u hakarak rekomenda ba ita mídia sira hotu, espesiál ba Tatoli, se bele halo kobertura mós ba área rurál no presiza kolabora serbisu hamutuk organizasaun ka rede defisiénsia nian hodi kobre ba ema ho defisiénsia ne’ebé vulnerável liu iha sosiedade,” Diretór Ezekutivu AHDMTL, Gabriel Ponciano de Sousa, hateten ba Agência Tatoli, iha ninia knar fatin Manleuana, kinta ne’e.
EhD iha rurál mak halo atividade barak nune’e hanesan ajénsia Estadu nian bele loke espasu ida ba ema ho defisiénsia sira halo atividade iha munisípiu sira.
Notísia relevante : AHDMTL rekomenda ME fasilita manorin-na’in hanorin ema ho kondisaun defisiénsia
AHDMTL rekomenda nune’e tanba durante ne’e akompaña produtu Tatoli nian sempre públika atividade ema ho defisiénsia nian maski seidauk másimu.
“Ami-nia akompañamentu durante ne’e ba produtu Agência Tatoli nian iha inkluzividade ba atividade hotu-hotu no kobertura sira ne’e mós tuir duni termu ka linguajen ba ema ho defisiénsia nian, inklui hahú ona halo promosaun ba atividade no programa ema ho defisiénsia nia iha terrenu. Tatoli implemeneta ona polítika inkluzaun sosiál,” nia akresenta.
Gabriel Ponciano fó hanoin, iha publikasaun ne’e presiza uza termu ne’ebé oinsá mak ema ho defisiénsia bele intende no labele hakanek ema ho kondisaun defisiénsia.
“Tanba dalabarak mídia balun hakerek ema ladún normál. Ida-ne’e labele, karik bele tau dehan ema ho defisiénsia,” nia tenik.
Iha fatin seluk, Diretora Asosiasaun Esperansa, Madalena da Costa, fó rekomendasaun ba Agência Tatoli atubele habelar nafatin informasaun kona-ba defisiénsia no liu-liu liga ba feto ho defisiénsia nia sobrevivénsia iha Timor-Leste.
“Tuir ha’u-nia akompañamentu ba notísia Tatoli furak tebes tanba habelar informasaun ne’ebé furak tebes nomós públika ona informasaun ne’ebé relasiona ba asuntu defisiénsia iha Timor-Leste,” nia tenik.
Jornalista : Osória Marques
Editora : Julia Chatarina
