DILI, 25 jullu 2024 (TATOLI)—Embaixada Repúblika Indonézia (KBRI, sigla indonézia) koopera ho Ministériu Finansa (MF), hala’o formasaun intensiva lian Indonézia, ne’ebé hahú kedan iha fulan-maiu ne’e, ba bolseiru timoroan na’in-30.
Bolseiru hirak ne’e sei desloka iha tempu badak hodi hala’o estudu iha área kontabilidade no estatístika iha instituisaun ensinu superiór rua iha Indonézia.
Embaixadór Indonézia, Okto Dorinus Manik, husu ba bolseiru sira atu aproveita oportunidade hodi hetan koñesimentu di’ak iha lian Indonézia hodi kontribui ba dezenvolvimentu Timor-Leste.
“Formasaun ne’e ho objetivu atu prepara estudante sira ba vida akadémika no sosiál iha rai-li’ur hodi fornese abilidade lian ne’ebé presiza hodi komunika ho efetivu durante sira hela iha Indonézia. Kursu ne’e bele aumenta abilidade hakerek, liu-liu atu kompreende estrutura hakerek sientífika, gramátika no vokabuláriu. Nune’e, ami hein katak joven timoroan sira ne’e bele hetan susesu iha sira-nia estudu. Ida-ne’e mak ami-nia hakarak ba dezenvolvimentu no reforsa rekursu umanu sira,” Embaixadór hateten iha Sentru Kulturál Indonézia, Caicoli, kinta ne’e.
Notísia relevante : Bolseiru na’in-30 sei bá estuda iha área estatístika no kontabilidade iha Indonézia
Iha biban hanesan, Diretór Jerál Servisu Korporativu iha MF, Joanico Pinto, dehan, bainhira haruka bolseiru bá hala’o estudu iha Indonézia, koñesimentu kona-ba lian nasaun ne’e sai hanesan kritéria ida, nune’e MF iha kolaborasaun ho Embaixada Indonézia organiza formasaun ida atu ajuda estudante sira adapta ba sistema akadémiku Indonézia.
“Ami-nia kooperasaun ho KBRI partikularmente kontinua nafatin ba futuru kuandu presiza bolseiru bá Indonézia, nune’e nia kritériu mak tenke hatane lian Indonézia tanba ita-nia prosesu aprendizajen iha ne’e ho lian portugés. Entaun, ida-ne’e hanesan bukae hodi adapta ho mundu akademia iha Indonézia,” nia tenik.
Bolseiru na’in-15 ne’ebé sei hala’o estudu iha Sekolah Tinggi Ilmu Statistik (STIS) iha Jakarta, sei desloka iha loron 04 agostu, enkuantu bolseiru seluk ne’ebé sei hala’o estudu iha Sekolah Tinggi Akuntansi Negara (STAN) sei desloka tarde liu iha fulan-agostu nia rohan ou inísiu setembru.
“Bolseiru Ministériu Finansa nian ba tinan ida-ne’e hamutuk 30, ne’ebé nia orsamentu alokadu husi Governu. Tinan kotuk ami haruka bolseiru 29 estudu iha ne’ebá no ida mak la konsege tanba moras psikolojia. Husi bolseiru 29 ne’e, na’in-14 pasa ona ezame no konklui ona estudu iha STIS, enkuantu na’in-15 iha STAN ramata ona estudu,” nia haktuir.
Diretór ne’e esplika, Governu nia preferénsia atu haruka estudante sira tuir kursu rua ne’e tanba hakarak prepara rekursu umanu sira tuir polítika reforma jestaun finanseira públika nian nomós ba rejenerasaun empregadu sira-nian.
Nune’e mós, Reprezentante bolseiru, Dominica de Sousa (idade 18), agradese ba oportunidade ne’ebé nia hetan.
“Agradese ba esperiénsia ne’ebé hetan, koñesimentu no konsellu husi profesór sira sei utíl ba ami nune’e bele kontribui ba dezenvolvimentu,” nia tenik.
Jornalista : Osória Marques
Editora : Julia Chatarina
