DILI, 20 Jullu 2024 (TATOLI) – Fundu Dezenvolvimentu Kapitál Umanu (FDCH) selebra akordu ho Ministériu Finansa (MF) hodi haruka bolseiru na’in-30 atu estuda iha área estatístika no kontabilidade iha Indonézia.
Diretór Ezekutivu FDCH, Júlio Aparício, informa bolseiru selesionadu na’in-30 ne’e sei arranka iha fulan-Agostu hodi hala’o estudu iha nível diploma IV iha área estatístika no kontabilidade ba anu akadémiku 2024/2025.
“Orsamentu ne’e ami aloka ba iha Ministériu Finansa no ida ne’ebé ita selu mak kustu vida, dormitóriu, propina ne’e depende ba idak-idak nian, seguru de saúde no matéria didátiku sira ne’ebé presiza”, diretór FDCH dehan ba Tatoli iha Balide.
Nia salienta katak MF kompromete, iha ámbitu asina akordu, katak bolseiru sira ne’e bainhira remata sira-nia estudu sai atomatikamente funsionáriu públiku iha ministériu ne’e.
“Bolseiru sira ne’ebé ita gasta Estadu nia osan bá eskola iha rai-li’ur ne’e kuandu fila mai ne’e Governu tenke uza iha área oioin, tantu iha área, edukasaun, enjenária, saúde no seluk tan. Ne’e Estadu iha obrigasaun atu uza, tanba sira bá eskola ne’e hanesan ona funsionáriu Estadu nian. Nonu Governu no Ezekutivu foun seluk ne’ebe mai ne’e tenke tau-matan ba bolseiru sira ne’e, tanba sira bá estudu ne’e Governu mak gasta osan, ne’ebé obrigatóriu tenke uza”, nia afirma.
Iha sorin seluk, Prezidente Konsellu Administrasaun FDCH, Gastão de Sousa, kongratula bolseiru sira no husu bolseiru foinsa’e hirak ne’e atu aproveita oportunidade, tanba timoroan barak buka oportunidade hanesan ne’e, maibé sira lahetan.
“Tanba ne’e, husu aproveita másimu durante hala’o estudu, tanba oportunidade hirak ne’e ema barak esforsu maibé lahetan”, nia reitera.
Aleinde ne’e, governante ne’e solisita mós ba FDCH no Komisaun Funsaun Públika (KFP) hodi haree modalidade bolsa estudu ida ne’e hodi aplika mós ba ministériu sira seluk ne’ebé oferese bolsa ba funsionáriu públiku no ba públiku ein jerál ne’ebé finansia husi orsamentu FDCH.
Notísia relevante: Bolseiru na’in-16 sei bá estuda iha POLTEKKES Indonézia
Jornalista: Osória Marques
Editora: Maria Auxiliadora
