PN realiza reuniaun plenária komisaun permanente semana ida dala ida durante resesu
DILI, 25 jullu 2024 (TATOLI)—Parlamentu Nasionál (PN), kinta ne’e, marka ona reuniaun plenária komisaun permanente semana ida dala ida iha kada tersa-feira, iha kada semana durante resesu.
Notísia Relevante: Parlamentu Nasionál hahú tama resesu
Segundu Vise Prezidente Parlamentu Nasionál, Alexandrino Afonso Nunes, hateten antes ne’e deside ona kada semana ida hala’o reuniaun plenária komisaun permanente iha kuarta, maibé iha loron ne’e iha reuniaun Konsellu Ministru, nune’e reprezentante Governu liuhusi Vise Ministru ba asuntu Parlamentár labele marka prezensa iha reuniaun plenária.
“Nune’e, ita aseita hodi muda fali reuniaun plenária komisaun permanente iha tersa, ne’ebé hahú iha semana oin,” nia hato’o iha Parlamentu Nasionál.
Nia dehan, Deputadu membru komisaun permanente ne’e hamutuk na’in-19 ne’ebé reprezenta kada bankada parlamentár iha Parlamentu Nasionál (PN).
Antes ne’e, iha 23 jullu 2024, PN realiza reuniaun plenária komisaun permanente dahuluk, ne’ebé partisipa husi Deputadu na’in-11.
Iha resesu ne’e, Deputadu sira bele aproveita hodi tun ba iha baze atu halo kontaktu eleitorál hodi rekoilla informasaun kona-ba saida mak povu enfrenta iha baze hodi bele levanta iha plenária.
Nune’e, husu Governu tau atensaun hanesan iha plenária dahuluk ne’e, komisaun permanente Deputadu sira nu’udar reprezentante povu kontinua foti preokupasaun asuntu infraestrutura báziku, bee-moos, saúde ho seluk tan hodi husu ezekutivu tau atensaun.
Entretantu, PN hahú tama resesu iha 15 jullu 2024 ne’e no sei tama fila-fali iha 15 setembru 2024.
Jornalista : Nelson de Sousa
Editór : Cancio Ximenes
