DILI, 16 jullu 2024 (TATOLI)-Parlamentu Nasionál (PN), iha 15 jullu, hahú tama resesu ne’ebé sei tama fali iha 15 setembru 2024.
Notísia Relevante: Ohin, PN realiza reuniaun plenária dahuluk ba lejislatura daneen
Prezidente Parlamentu Nasionál, Maria Fernanda Lay, hateten ohin reuniaun plenária bankada parlamentár sira hotu iha konsensu hodi konstitui Komisaun Permanente PN hodi asegura nafatin funsionamentu órgaun soberania daruak ne’e iha períodu resesu.
“Ha’u agradese iha konsensu ne’e, hodi garante serbisu funsionamentu,” nia hateten iha reuniaun plenária PN.
Tanba ne’e, bankada parlamentár sira hotu iha konsensu la halo eleisaun ba kargu sekretáriu, vise prezidente ba komisaun permanente, nune’e mantein nafatin estrutura meza PN atuál ne’ebé iha.
Aleinde ne’e, durante resesu PN sei hala’o de’it reuniaun plenária semana ida dala ida iha loron kuarta-feira, maibé la taka dalan ba ajenda importante sira iha plenária estraordináriu ruma bainhira Prezidente PN mak iha kompeténsia atu foti hodi marka trata ka diskute asuntu importante ruma.
Tuir konstituisaun artigu 102 (Komisaun Permanente) hateten, Komisaun Permanente halo la’o serbisu nafatin iha períodu ne’ebé Parlamentu Nasionál para hela, iha intervalu sesaun no mós iha kazu seluk-seluk previstu iha Konstituisaun.
Komisaun Permanente nia ulun-boot mak Prezidente Parlamentu Nasionál nian hariik husi Vise-Prezidente sira no partidu sira-nia Deputadu, tuir fahe-baluk reprezentasaun nian iha Parlamentu Nasionál.
Kompete ba Komisaun Permanente mak akompaña serbisu sira Governu nian no mós administrasaun nian, koordena serbisu sira komisaun nasionál nian, promove konvokasaun Parlamentu Nasionál nian, prepara no organiza Parlamentu Nasionál nia sesaun sira, autoriza deslokasaun Prezidente-Repúblika iha rai-laran, dirije Parlamentu Nasionál nia relasaun ho parlamentu no instituisaun análoga sira iha rai-seluk no autoriza deklarasaun Estadu serku nian no Estadu emerjénsia nian.
Notísia Relevante: Estrutura PN lejislatura daneen sai modelu ba promosaun reprezentasaun feto
Jornalista : Nelson de Sousa
Editór : Cancio Ximenes
