DILI, 25 Jullu 2024 (TATOLI) – Polísia Sientífika no Investigasaun Kriminál (PSIC, sigla portugés) detein ona ema na’in-lima, sidadaun Nijéria rua no timoroan tolu, ne’ebé suspeita ba komete krime burla agravada no informátika, nomós lavajen osan.
Portavós PSIC, Inspetór-Xefe Mário Tavares, informa katak ema na’in-lima ne’ebé suspeita ba kazu transferénsia osan ilegál, tanba sira halo atividade hacking ba empreza legál rua iha Singapura, liuhusi email ne’ebé empreza rua halo konversa ba malu. Grupu organizadu ne’e kria fali empreza ida ho ilegál iha Timór hodi hetan benefísiu husi atividade ne’e.
Tuir inspetór-xefe, kazu ne’e akontese iha segunda-feira, 22 Jullu, bainhira sidadaun timoroan na’in-tolu ba halo levantamentu osan besik millaun $3 iha Banku Mandiri Timor-Leste. Iha loron hanesan Departamentu INTERPOL Polísia Sientífika no Investigasaun Kriminál Timor-Leste simu mós informasaun husi Singapura katak iha empreza ida iha Timór mak halo atividade business email compromise.
Mário Tavares esplika husi atividade business email compromise ne’ebé halo ho intensaun atu troka konversa entre empreza rua iha Singapura, tanba empreza ida konsege transfere sala osan ho montante millaun $42 ba konta bankária empreza ilegál iha Timór ho naran Six One Commodities Pte. Ltd, ne’ebé rejista ho naran hanesan ho empreza legál iha Singapura.
“Sira hacker tiha konversa ne’ebé kompañia legál rua halo bainhira sira halo transferénsia osan bele tama ba kompañia ilegál nia konta bankária. Kazu ida ne’e akontese duni”, nia relata.
Sidadaun estranjeiru ne’ebé sai autór ba kazu ne’e mai husi nasaun Nijéria, depois sira husu ajuda ba timoroan na’in-tolu hodi harii fali empreza ilegál ne’e hodi hacking konversa empreza legál rua iha Singapura ho intensaun bainhira empreza rua legál ne’e halo transferénsia osan bele tama fali ba empreza ilegál iha Timor-Leste ne’ebé rejista ho naran hanesan.
Bainhira empreza ida iha Singapura halo ona transferénsia osan ho montante millaun $42, nia la hatene katak haruka osan ba empreza ne’ebé ilegál no kuandu ida legál ne’e hein atu simu osan, maibé la simu transferénsia, entaun empreza ne’e halo reklamasaun ba empreza ida transfere ne’e katak seidauk simu osan. Ho nune’e, bainhira halo fali konfirmasaun foin hatene katak nia halo transferénsia sala ba empreza ilegál ho naran hanesan.
“Kompañia ne’e buka tuir fali informasaun, nia hetan númeru konta bankária husi fali Timór. Nia hakfodak katak ema hacker tiha sira-nia konversa ne’e, entaun kompañia ne’e halo kedan kontaktu ho INTERPOL Singapura hodi informa kazu ne’ebé akontese ba sira. Nune’e, parte INTERPOL Singapura informa kedan mai PSIC, nune’e Departamentu PSIC halo kedan intervensaun iha loron 23 Jullu 2024 iha oras tuku 14:00”, adianta.
Departamentu PSIC uza ninia meiu hotu ho Servisu Nasionál Intelijénsia no Banku Sentrál nia apoiu konsege halo serbisu hotu no iha tuku 16:00 detein sidadaun timoroan na’in-tolu. Depois iha tuku 20:00 detein tan sidadaun nijerianu na’in-ida ho osan iha karreta laran no iha fali tuku 04:00 madrugada ka’er tan nijerianu seluk ho osan iha karreta laran. Nune’e, husi montante osan ne’ebé PSIC apreende ne’e hamutuk millaun $2-resin.
PSIC sei submete suspeitu na’in-lima ne’e ba Ministériu Públiku hodi hala’o prosesu tuir lei ne’ebé vigora.
Ba restante osan ne’ebé sei iha, tuir lei Brankeamentu Kapitál, autoridade judisiária sei halo konjelamentu, nune’e laiha ema ida mak halo tan levantamentu.
Jornalista: Tomé Amado
Editora: Maria Auxiliadora
