BOBONARO, 26 jullu 2024 (TATOLI)-Publikasaun notísia, textu no imajen sira husi mídia estatál Ajénsia Notisioza Timor-Leste, Institutu Públiku (TATOLI,IP) durante ne’e sai referénsia ba Prezidente Autoridade Munisípiu (PAM) Bobonaro, Alexandrino Pires, atubele identifika problema ne’ebé akontese iha terrenu.
Prezidente Autoridade Munisípiu Bobonaro, hato’o apresiasaun ne’e relasiona no selebrasaun aniversáriu TATOLI ba tinan ualu (27 jullu 2016-27 jullu 2024).
Nia konsidera notísia husi TATOLI kapaas no di’ak tebes tanba publika problema balu ne’ebé ke nia rasik la hatene no la asesu.
Nia dehan, TATOLI sai hanesan referénsia no parseiru di’ak ba autoridade munisípiu, tanba asume kargu nu’udar Prezidente Autoridade munisípiu Bobonaro durante fulan-haat nia laran, jornalista destakadu sempre akompaña nia ho ekipa sira bainhira hala’o atividade iha terrenu.
Notísia relevante: TATOLI servisu justu halo kobertura ba atividade musulmanu fahe ba sosiedade
“Ida-ne’e mak ha’u dehan katak Tatoli ha’u-nia parseiru di’ak ida durante ha’u-nia mandatu, tanba só liuhosi mídia maka bele esplora saida mak ha’u halo iha munisípiu Bobonaro, dalaruma problema ne’ebé ha’u lahatene no la asesu, Tatoli sempre publika, fó informasaun ba ha’u, ne’ebé ha’u pesoál kontente, tanba Tatoli fó informasaun mai ha’u,” nia hato’o apresiasaun ne’e iha Maliana, kinta ne’e.
Biban ne’e, Prezidente Autoridade Munisípiu Bobonaro hato’o parabéns ba Ajénsia Notisioza Timor-Leste lideradu Manuel Pinto, ne’ebé iha sábadu, loron 27 fulan-jullu selebra ezisténsia ba da-ualu nu’udar mídia estatál iha Timor-Leste.
Tuir nia, ho aumenta tinan ne’e lideransa TATOLI presiza tau-matan ba kondisaun jornalista sira-nia no prepara fasilidade hanesan; laptop, kamera, transporte atubele fasilita ekipa hala’o atividade jornalístika iha terrenu ho kualidade no efetivu liután.
“Ha’u hanesan Prezidente Autoridade preokupa oituan imi-nia kondisaun fasilidade balu seidauk kompletu, maibé imi hatudu imi-nia vontade, seriedade no imi-nia domin, katak imi hadomi duni rai ida-ne’e atu ba oin, mídia nia papél importante la halimar, imi hadomi duni Tatoli, mai ho kondisaun, limitasaun mas imi sei halo servisu nafatin,” nia katak.
Nia observa publikasaun Tatoli kuaze povu iha munisípiu Bobonaro no ema hotu-hotu iha rai-laran no rai-li’ur asesu ho di’ak no kredivel.
Nia rekomenda ba Prezidente Konsellu Diretivu Ajénsia TATOLI, katak iha tinan 2025 tenke tau prioridade halo rekrutamentu atubele apoia no reforsa liután jornalista nia servisu iha baze tanba munisípiu Bobonaro joegrafikamente iha área luan no iha suku 50 no postu administrativu neen.
“Ema ida de’it sei labele halo servisu hotu-hotu, di’ak liu imi aumenta tán, tanba ha’u komprende buat ida ba foti mai hakerek ne’e la fasil, presiza konsentra duni, hodi prodús informasaun ke di’ak.”
Prezidente Autoridade Bobonaro aproveita opurtunidade ne’e husu ba Prezidente Tatoli atu konsidera preokupasaun jornalista destakadu sira hosi munisípiu iha proposta OJE 2025.
Notísia relevante: TATOLI iha papel edukativu atu hanorin sosiedade liuhusi informasaun
Jornalista: Sérgio da Cruz
Editór: Evaristo Soares Martins
