TATOLI iha papel edukativu atu hanorin sosiedade liuhusi informasaun
DILI, 26 jullu 2024 (TATOLI)–Mídia Estatál TATOLI iha papel edukativu atu hanorin sosiedade Timor-Leste liuhusi informasaun ka notísia ne’ebé publika loro-loron iha portál TATOLI nian.
Notísia Relevante: Membru PN rekomenda TATOLI tenke garante kualidade informasaun
Responsável ne’e hato’o ikestaun ne’e, nalait nakait ho selebrasaun aniversáriu Tatoli ba da-ualu (8) ne’ebé kada tinan selebra iha loron 27 jullu.
“Oportunidade di’ak ida-ne’e, dahuluk ha’u reprezenta HAK hanesan sosiedade sivil hato’o parabéns ba Tatoli ne’ebé selebra tinan ualu (8) iha 27 Jullu halo ona nia ezisténsia. Tatoli hala’o knaar no serbisu primeiru halo papel ida fahe informasaun no iha mós papel fó formasaun no edukasaun ba sosiedade. Tanba, informasaun ne’ebé Tatoli hato’o ho loloos tuir lia-loos ba interrese komun, asuntu ne’ebé ligadu ba nesesidade sidadaun nian no asuntu ba dezenvolvimentu nasionál nian, Tatoli iha papel no knar di’ak. Ba maluk sira ne’ebé serbisu iha Tatoli, ha’u hato’o parabens,” Vise Diretór HAK, Antoninho de Lima, hatetetn ba Agência Tatoli, iha Faról.
Nia dehan, TATOLI P iha nia papel advokasia ba asuntu dezenvolvimentu nasionál liuliu foti ema kbiit laek sira-nia lian, Tatoli konsege foti opiniaun husi parte hotu-hotu, oinsá hato’o progresu dezenvolvimentu ba iha sosiedade.
TATOLI ladún publika liafuan krítika ne’ebé halo entrevista husi sosiedade sivil sira, maibé einjerál Tatoli fó informasaun di’ak ba konsumu públiku.
Tanba ne’e, nia sujere ba TATOLI hodi hadi’a tékniku hakerek kona-ba konteudu notísia iha área oioin ne’ebé publika sai ba portál.
“Sita liafuan balun dalaruma falla tiha, termus balun laloos liuliu iha dezenvolvimentu Tetun. Maluk sira presiza haree liafuan didi’ak no sita termus espesifiku ba asuntu ho loloos, se lae sentidu seluk tiha. Ida-ne’e mak ami-nia observasaun durante ne’e,” nia hateten.
Nia fo ezemplu, se TATOLI hakerek iha lingua Indonézia iha liafuan ka ortografia iha ikus “ng”, “g” ne’e lakon tiha. hanesan mos liafuan balun iha tetun lakon iha liafuan klaran no ikus.
Nia husu ba TATOLI atu promove informasaun kredivel ba iha sosiedade sein interrese ka intervensaun polítika iha TATOLI.
“Importante ba Tatoli mak haburas knaar edukasaun liuhosi fahe informasaun kredivel, tanba konsumidór sira-nia haree Tatoli nia di’ak ne’e, bainhira fornese informasaun kualidade no kredivel. Ida-ne’e mak imajen di’ak Tatoli nian,” nia dehan.
Nia sujere atu Tatoli iha móss relasaun servisu di’ak ho sosiedade sivil sira hotu liuliu HAK hodi kobre asuntu interrese Estadu nian ba dezenvolvimentu iha rai ne’e ho di’ak.
Tuir nia, sosiedade sivil no mídia iha papel importante hodi akompaña progresu no dezafiu ba dezenvolvimentu nasionál.
“Mídia ho sosiedade sivil iha papel ida atu krítika no fahe informasaun edukativa,” nia hateten.
Jornalista : Jesuína Xavier
Editór : Cancio Ximenes
