DILI, 26 Jullu 2024 (TATOLI) – Ajénsia Notisioza Timor Leste – Tatoli, I.P, selebra misa agradesimentu ba ezisténsia da-8 nian iha igreja Motael, ne’ebé dirije husi Padre Francisco Indra do Nascimento.
Iha okaziaun ne’e amu selebrante husu ba funsionáriu sira hotu iha Tatoli, liuliu parte redasaun atu divulga informasaun ba públiku tenke halo análize ida profunda atu leitór sira bele konvensidu.
“Nu’udar jornalista iha serbisu barak ne’ebé atu halo. Tanba ne’e, ha’u enkoraja nafatin, liuliu ba Tatoli atu matenek liután oinsá bele haree situasaun sira agora ne’e. Ita tau hanesan konseitu públiku ida ne’ebé ita tenke analiza no tetu didi’ak antes partilla informasaun ba ita-nia leitór sira, tantu iha rai-laran no li’ur”, saserdote ne’e hato’o, ohin.
Padre salienta katak bainhira notísia ida ne’ebé di’ak no kualidade, buat ida importante mak jornalista tenke komprende saida mak nia hakerek atu ema seluk bele komprende di’ak liután. “Tanba ne’e, jornalista sira iha Tatoli tenke sai ema ne’ebé profisionál no preparadu atu divulga informasaun ruma ba públiku ho rigór”, nia afirma.
Nune’e mós, Sekretáriu Estadu Komunikasaun Sosiál, Expedito Dias Ximenes, parabeniza Tatoli ba nia ezisténsia da-8. “Ha’u husu ba Konsellu Diretivu Tatoli hamutuk ho funsionáriu sira atu halo reflesaun, atu iha tinan ne’ebé mai bele kontribui di’ak liután notísia ida ne’ebé kualidade”, nia enkoraja.
Iha misa ne’e partisipa husi Sekretáriu Estadu Komunikasaun Sosiál, Expedito Dias Ximenes, Prezidente Konsellu Diretivu Tatoli, I.P, Manuel Pinto, Vise-Prezidente ba Asuntu Administrasaun no Finansa, Olandino da Costa, Vise-Prezidente ba Asuntu Mídia no Jornalístika, Xisto Freitas da Piedade, no funsionáriu Tatoli tomak.
Prezidente Tatoli husu atu reforsa kooperasaun hodi lori instituisaun ba oin
Iha ámbitu selebrasaun aniversáriu Tatoli, I.P, ne’ebé realiza iha Farol, Prezidente tutela, Manuel Pinto, solisita ba serbisu-na’in sira iha instituisaun ne’e atu hametin kooperasaun hodi lori Tatoli ba oin.
“Ha’u husu ba parte administrasaun no redasaun, xave ida de’it mak ba oin tenke hametin kooperasaun ida di’ak liu hodi hasa’e abilidade komunikasaun ba malu atu garante futuru Tatoli nian ho di’ak liután”, prezidente hateten, ohin.
Nia dehan kestaun ema barak ka uitoan la sai problema ida ba Tatoli, maibé importante liu mak presiza kria ambiente ida di’ak hodi bele asegura serbisu sira hotu tuir diresaun idaidak nian.
“Ita presiza reforsa ita idak-idak nia aan, liuhusi kooperasaun serbisu hahú husi parte diresaun to’o seksaun sira, husi ema ba ema, nune’e ita bele iha abilidade komunikasaun ida di’ak hodi bele koordena serbisu sira la’o ho di’ak. Parabéns ba hotu-hotu, buat di’ak ka aat ne’ebé Tatoli hetan mai husi kontribuisaun ema hotu nian. Ne’e duni ho Tatoli nia aniversáriu ba da-8 ne’e ema hotu bele sai maduru liután”, nia realsa.
Dirijente ne’e dezafia funsionáriu hotu katak husi tinan ualu ne’e tenke sai sasukat ida atu sai di’ak liután, tanba husi tempu ne’ebé la’o sempre mai ho buat ne’ebé foun. Husi dedikasaun ema nian kuandu kle’ur liu iha fatin ida dalabarak hanoin buat sira ne’e baibain ona. “Entaun, dala ruma ladún tau importánsia ba sasán ki’ik, nune’e mak sempre satán dezenvolvimentu ba oin. Maibé, fiar katak ho tinan ualu ne’e bele sai di’ak liután kompara ho tinan ualu bá kotuk”, nia konklui.
Notísia relevante: TATOLI iha papel edukativu atu hanorin sosiedade liuhusi informasaun
Jornalista: Domingos Piedade Freitas/Tomé Amado
Editora: Maria Auxiliadora
