Relasiona ho divulgasaun informasaun husi media sira kona-ba kazamentu sívil husi ema na’in rua seksu hanesan inclui timor oan ida, iha Darwin Austrália. Informasaun ne’e sai viral iha loron Domingo, 21 de Julho 2024, hodi hamosu ona diskusaun publika. No konsidera ba preokupasaun públiku nian atu hatene oinsá Igreja nia pozisaun ba kazamentu sívil ema ho seksu hanesan, mak Conferência Episcopal Timorense fó sai Komunikadu Imprensa ida-ne’e hodi hatuur Igreja Katólika nia pozisaun tuir nia hanorin sira.
Uluk nanain, Igreja Katólika nia papél nu’udar inan no mestra, fiél ba nia fundadór Jesus Cristo hatur nia án nu’udar hun no rin ba lialos, simu fiar atu fo moris ba nia oan sira, hanorin no hatudu dalan ba sira. (Mater et Magistra, 1).
Nu’udar inan, Igreja hadomi, simu, tau matan, haku’ak no akompaña Maromak nia oan hotu la haree ba kó, rasa no jéneru. Nu’udar mestra, nia hatur aan iha we matan inan tolu fiar Igreja Katólika nian ne’ebé la maran, ne’e mak: Sagrada Escritura, Santa Tradisaun no Magistério.
Tuir roman Sagrada Escritura nian, ema feto no mane hori hahú Maromak halo tuir nia ilas no tanesan (Gn 1,27). Tuir mai kedas Maromak hari matrimóniu hodi tau hamutuk feto no mane ida nu’udar dalan moris nian hodi hatutan obra kriadora Maromak nian. Maromak haraik bensaun ba ema feto no mane ho liafuan hirak ne’e: imi sai buras, sai barak no hakonu rai klaran ba. Mane ho feto nia moris hamutuk mak natureza lolós ba matrimóniu. Iha Testamento Foun Jesus Cristo afirma matrimóniu nu’udar união feto ho mane tuir hanorin livro Genesis nian, hodi dehan: “Tan ne’e mane sei husik nia aman no inan hodi ba hamutuk ho nia fén kaben, nune’e sira rua sai isin ida de’it”. (Mc 10,7-8; cf. Gn 2,24).
Ho roman Sagrada Escritura nian mak Igreja hatur nia doutrina ética seksuál nian iha lala’ok ordem natural nu’udar regra ne’ebé esensiál no indispensável.
Iha kontestu Santa Tradisaun Kreda nian, Santo Agostinho hanorin katak matrimóniu tenke iha elementu tolu ne’e: pleros katak nakloke ba moris foun ka procriação, fides katak iha fidelidade nia laran no lori ba sakramentu.
Catecismo Igreja Katólika hanorin katak aliança matrimóniu nian ne’ebé mane ho feto ida harii hamutuk iha komuñaun ba moris tomak, hodi lori ba sira na’in rua nia di’ak, ba kontinuasaun husi sira-nia jerasaun no ba oan sira nia edukasaun, no husi Cristo komuñaun ne’e foti sa’e ba diginidade sakramentu nian. (Cfr. CIC 1601, 1642; CDC 1055).
Santa Kreda defende nafatin diginidade matrimóniu nian iha nia hanorin sira. Papa João Paulo II iha nia exortação apostólica Familiaris consortio, asentua katak natureza husi matrimóniu nu’udar símbolu no koncretizasaun iha relasaun domin entre Cristo ho Igreja, no domin kaben-na’in sira nian nu’udar elementu fundamentál husi matrimóniu (Familiaris Consortio, 18). Papa Francisco, iha nia exortação apostólica Amoris Laetitia hateten Igreja nia pozisaun claro kona-ba matrimóniu katak união exclusiva, estável, no indissolúvel to’o mate entre feto ho mane, hodi hatutan geração, hetan bênção no graça sakramentu nian atu bele sai Igreja domestica no fermento moris foun nian iha sociedade. (Amoris Laetitia, 292).
Mesmo documento ikus ho naran Fidúcia supplicans husi Papa Francisco ne’ebé hamosu interpretasaun oi-oin, iha nia konteúdu la kontradiz, ném hasai elementu ida husi doutrina Igreja nian kona-ba sakramentu matrimóniu.
Bazeia ba explikasaun sira ne’e hotu, mak ohin loron 26 de Julho 2024, loron ne’ebé Santa Kreda celebra festa família São Joaquim no Santa Ana nian, Na’in Feto Maria nia aman no inan, iha festa família ne’e duni mak Amo Bispo sira exorta ba sarani timor-oan hotu, katak:
- Nu’udar Timor oan no sarani Katólika kaer metin nafatin ba ita-nia identidade relijiosa no kultural.
- Sarani sira hotu tane a’as valor no dignidade matrimóniu tuir hanorin Igreja Katólika nian.
- Ema ida-idak feto eh mane tenke reconhece no simu nia identidade seksuál (Catecismo da Igreja Katólika, 2333) hanesan graça ida husi Maromak no labele reduz nia identidade seksuál baseia deit ba nia inclinação ka orientasaun seksuál desordenada.
- Ema ida-idak independentemente husi ninia orientasaun seksuál, mesak Maromak oan ne’ebé ita tenke respeita tuir ninia dignidade, ita buka evita hahalok oi-oin ne’ebé discrimina no lori ba violência. (Amoris Laetitia, 250).
- Iha biban ne’ebé ita hein hela Santo Padre Francisco nia vizita mai ita rai doben Timor-Leste, Amo Bispo sira convida família sira hotu atu prepara án ba hasoru Amo Papa nu’udar peregrinação espiritual ida família nian: aman, inan no oan sira sei la’o hamutuk, hodi ba simu Bênção Apostólica husi Amo Papa. *
