DILI, 26 jullu 2024 (TATOLI)— Sekretária Estadu ba Igualdade, Elvina Sousa Carvalho, prefere, feto asesu ba rai no propriedade hodi bele empodera ekonómiku.
“Karik feto laiha asesu ba rai no propriedade mak sei laiha justisa ba feto no laiha seguransa ba hela fatin hanesan uma no rendimentu. Hanesan ita hotu hatene katak feto maioria hela iha area rurál no moris hanesan agrikultór, ne’e duni rai hanesan kapitál ida importante tebes ba feto no mane sira atu sira bele jere hanesan rekursu produtivu ida atu prodús ai-han no halo négosiu hodi aumenta rendimentu nune’e feto sira bele hakonu sira-nia nesidade sira hanesan hahán, edukasaun, saúde no nesidade bázika sira seluk,” Sekretária Estadu Elvina hateten, dirante diskusaun iha meza redonda, Delta Nova, sesta ne’e.
Notísia relevante : SEI atribui rihun $134 ba Asosiasaun Feto Munisipál no Fundasaun AHISAUN
Nia nota, Timor-Leste nia kultura ne’ebé maioria domina husi mane no fó favor liu ba mane sira mak atu sai na’in ba rai. Tanba ne’e, inistiativa ba diskusaun meza redonda ne’ebé mak realiza husi SEI no Fórum Komunikasaun ba Feto Timor-Lorosa’e (FOKUPERS) ne’e importante tebes atu ema hotu bele haree no diskute kona-ba knaar no responsablidade saida de’it mak instituisaun Estadu no Governu nian hanesan Sekretaria Estadu ba Terra no Propriedade (SETP), SEI, Defensoria Públiku no seluk tan bele hala’o no saida mak sosidade sivíl sira halo hodi asegura implementasaun lei ne’ebé iha, atu nune’e feto no grupu vulnerável sira hotu inklui feto sobrevivente violénsia bazeia jéneru sira bele iha asesu ba rai no propriedade.
SEI kontinua nafatin buka hodi hametin parseria ho parte hotu hodi halo sensibilizasaun lei sira ne’ebé mak relevante ba feto nia direitu ba rai no propriedade atu feto sobrevivente sira husi Violénsia Bazeia Jéneru mós moris dignu iha sosiedade no nasaun Timor-Leste.
Iha fatin hanesan, Diretora FOKUPERS, Domingas Amaral, hateten, objetivu husi diskusaun redonda ne’e mak atu hasa’e ema-nia konsiénsia atu foti desizaun no parte interesada sira katak Violénsia Bazeia Jéneru hasoru dezafiu atu asesu ba justisa no direitu ba rai no propriedade.
Konsidera evidénsia sira ne’ebé iha nu’udar oportunidade ba planeamentu Orsamentu Jerál Estadu ba tinan 2025 no futuru hetan evidénsia ne’ebé suporta FOKUPERS nia peskiza tuir mai ne’ebé foka liu ba feto sobrevivente VBJ nia direitu ba justisa inklui asesu ba rai no propriedade.
“Diskusaun redonda ida-ne’e mos atu aprezenta evidénsia ba dezenvolvimentu Jerál Estadu, análiza dezafiu sira ba desizaun jurídiku liga ba asesu rai no propriedade sobrevivente VBJ, promove diskusaun sensibiliza foti desizaun kona-ba asesu ba justisa rai no propriedade,” nia tenik.
Diskusaun ne’e partisipa husi Sekretáriu Estadu Terrasno Pripriedade, Reprezentante Prokuradór Jerál, Ministériu Finansa, no marka prezensa mós husi parseiru importante sira hanesan DIFAT, Raes Hadomi Timor Oan (RHTO), The Asia Fundation, Programa Monitorizasaun Sistema Judisiál (JSMP), UN Women, no ONG OXFAM.
Jornalista : Osória Marques
Editora : Julia Chatarina
