DILI, 27 jullu 2024 (TATOLI)—Ekipa konjunta kompostu husi Polísia Sientífika Investigasaun Kriminál (PCIC, sigla portugés) no Servisu Nasionál Intelijénsia (SNI), iha sesta (26/07) lorokraik, detein tan sidadaun estranjeiru na’in-rua ho inisiál SP no MU.
Sidadaun rua ne’e nu’udar grupu husi suspeitu na’in-lima ne’ebé antes ne’e envolve krime brankamentu kapitál no seluk tan, ne’ebé foti subar osan ho montante millaun $42.
“Horiseik pur volta tuku lima lorokraik, liuhusi ita-nia ekipa konjunta ne’ebé kompostu husi PCIC no SNI kontinua buka tuir arguidu sira ba kazu burla informátika, brankamentu kapitál no lavajen osan ne’ebé antes ne’e envolve suspeitu na’in-lima, ho nune’e liuhusi operasaun ne’ebé ita-nia ekipa konjunta halo ne’e horiseik konsege detein tan sidadaun na’in-rua,” Portavós PCIC, Investigadór Xefe, Mário Tavares, hateten ba Agência Tatoli, via telefónika, sábadu ne’e.
Notísia relevante : Kazu transferénsia osan ilegál, hahú Prosesu Interrogatóriu
Suspeitu na’in-rua hanesan sidadaun Indonézia, ne’ebé mak serbisu hamutuk ho suspeitu na’in-lima.
“Ekipa konjunta kaer sidadaun na’in-rua iha fatin balun iha Dili, ein prinsípiu suspeitu sira ne’e serbisu hamutuk ho suspeitu na’in-lima, ne’ebé antes ne’e PCIC detein ona iha loron hirak liubá,” nia akresenta.
Daudaun sidadaun estrajeiru na’in-rua ne’e detein ona iha sela detensaun PCIC hodi sai detidu iha oras 72 molok aprezenta ba Tribunál.
Aleinde ne’e, ekipa konjunta halo apreensaun ba osan ho montante $150.00, ne’ebé suspeitu sira rai iha sira-nia rezidénsia.
“Evidénsia sira daudaun asegura ona iha edifísiu PCIC nu’udar objetu krime hodi aprezenta ba Ministériu Públiku,” nia tenik.
Jornalista : Natalino Costa
Editora : Julia Chatarina
