DILI, 27 jullu 2024 (TATOLI)- Tribunál Primeria Instánsia Dili (TJPID), sabádu (27/7) ohin, halo interrogatóriu dahuluk ba arguidu Nijerianu na’in rua inklui timoroan na’in tolu ne’ebé envolve kazu tranferénsia osan sala.
Iha prosesu interrogatóriu dahuluk ne’e Ministériu Públiku ne’ebé husi Prokuradór Domingos Goveia Leite, João Marques no Pedro Baptista promove arguidu sira ho krime brankamentu kapitál n lavajen osan ne’ebé previstu artigu 313, burla informátika artigu 268 no asosiasaun kriminál 188 husi Kódigu Penál Timor-Leste.
Iha prosesu interrogatóriu dahuluk ne’e, arguidu na’in lima hili direitu ko’alia nune’e Tribunál hodi separa sira hodi autoriza arguidu idak idak fó nia depoimentu perante prosesu julgamentu ne’e.
Nune’e iha prosesu interrogatóriu dahuluk ne’e Tribunál foin mak rona arguidu ida nia deklarasaun enkuantu arguidu sira seluk tanba kestaun tempu Tribunál deside kontinua rona fali sira-nia depoimentu iha domingu (28/7) aban tuku 10:00 dadeer.
Defeza husi arguidu sira, Advogadu Privadu, Octavio Cardoso hateten, Tribunál Judisiál Primeira Instánsia Dili halo interrogatóriu dahuluk ba arguidu na’in lima ne’ebé mak autoridade seguransa detein foin dadaun ne’e.
“Iha faze primeiru interrogatóriu, iha faze primeiru interrogatóriu ida-ne’e Tribunál foin halo identifikasaun ba arguidu na’in lima no iha prosesu identifikasaun ida-ne’e kle’ur, tanba presiza halo tradusaun ba arguidu na’in rua,” Octavio Cardoso hateten ba jornalista hafoin ramata interrogatóriu dahuluk ba arguidu na’in lima iha TJPID, sábadu, ohin.
Nia adianta, hafoin halo tiha identifikasaun ba arguidu na’in lima, Tribunál rona kedan arguidu ida-nia deklarasaun ba kazu ne’e, maibé tanba kestaun tempu Tribunál lakonsege rona hotu arguidu ne’e nia deklaran no prosesu ne’e sei kontinua fali ba aban.
Entrantu, interrogatóriu dahuluk ne’e prezide hosi Juíz turnu Afonso Carmona, Ministeriu Públuku ne’ebé hosi Prokuradór Domingos Goveia Leite, João Marques no Pedro Baptista no arguidu sira hetan asisténsia legál husi Defensór Públiku no Advogadu Privadu.
Notísia relevante:PSIC detein nijerianu na’in-rua no timoroan tolu ba kazu transferénsia osan ilegál
Jornalista: Natalino Costa
Editór: Rafael Ximenes de A. Belo
